周星馳-算死草 (粵語劇本)

公元一八九九年 廣州
畫外音：滿清末年，廣東有橋王陳夢吉，職業狀棍，專以窒人為樂，以整蠱人為榮。仇家多不勝數，呢一日，陳夢吉嘅仇家丐幫幫主洪十八，喺眾丐慫恿之下決定搵陳夢吉計數，至於兩人如何結怨，為乜結怨就實在無從稽考。
（丐幫幫主洪十八帶眾弟子，嚟搵陳夢吉，阿歡見狀，飛奔返去話俾陳夢吉知）
洪十八：陳夢吉你個衰人我今日同你搏命。
阿歡：死喇！死喇！師父，死喇！！死喇！師父！師父呀！師父！
陳夢吉：歡！等你呀。（跳繩）
陳夢吉：熊人熊人，單雙，熊人熊人，跌地。熊人熊人轉個圈，熊人熊人get away！
阿歡：師父呀，師父，
陳夢吉：歡！
阿歡：阿師父，丐幫洪十八嚟找你晦氣呀！
陳夢吉：系？（對準阿歡的腦袋就是一腳）
阿歡：師父一定諗到橋嘞系咪呀？（阿歡倒在地上鼓掌，臉上帶著興奮的表情）
陳夢吉：冇橋冇橋，純粹系見你樣衰，試嚇伸你一腳架啫。哎！咪俾我望到呀，唔系抵唔住頸又伸多嘢架嘞。
阿歡：啊！師父呢思維，果然天馬行空仿如逆水行舟，師父即系師父，橋王即系橋王呀。
陳夢吉：咪橋王前橋王后起勢咁嗌得咖！好大壓力架，大佬！
阿歡：系嘅！系嘅！
（鏡頭轉向陳夢吉家門外）
洪十八：陳夢吉，快啲躝出嚟！
幫眾：躝出嚟！躝出嚟！
洪十八：陳夢吉同我躝出嚟！系咪知道你契爺我嚟睇你，唔敢出嚟呀？怕咗我陣乞隨呀？再唔出嚟，我掘開你祖宗嘅山，掘埋啲骨磨粉喂雞！
阿歡：師父。（將石頭交畀陳夢吉）
（門內陳夢吉將一嚿石拋向門外，啱掟中洪十八隻腳）
幫眾一：大佬，嚿石春有字架喎！
洪十八：寫乜春啊？
幫眾一：搵人請敲門呀系！
洪十八：啊？同我玩斯文。
（洪十八與陳夢吉大戰，最後洪十八同丐幫眾弟子大敗，重飲咗陳夢吉加咗瀉藥嘅尿，鬼死咁狼狽噉逃走。陰功咯。）
洪十八：陳夢吉你聽住，我數三聲你好舉高雙手投降。如果唔系我哋攻入嚟。
陳夢吉：咦，嚟真架喎佢哋。點睇呢，呢鑊？
阿歡（透過門罅觀察後門情況）：嘩！哎呀，師父，佢哋喺後邊玩火呀！
陳夢吉：唔奇吖，我哋啱啱至玩完嚟。
洪十八：一！
阿歡：死嘞！死嘞！
洪十八：二！二個半！三！
陳夢吉（挾持阿歡）：冇再迫我呀嗱！唔系我殺人質呀！
阿歡：救我！洪大哥！洪大哥！
洪十八：☆ △ ◎ ※ ！☆
眾丐：用啲屎潑佢！
阿歡：啊！——
洪十八：鬼吖！鬼吖！鬼吖！撞邪呀！撞邪呀！
（門內）
陳夢吉：玻璃門都未曾見過，井底之蛙！
阿歡：啊！師父上次原來遊歷德國買塊噉乜嘢返嚟就系噉乜樣用架。
洪十八：個個捻住曬個鼻？！大佬依家好臭呀？
（突然落雨）
洪十八（大笑）：陳夢吉，你估唔到呢，個天都幫我呀！落雨幫我洗身啦！啊哈哈——，大啲！
陳夢吉：洪兄！（洪十八四圍搵陳夢吉）
陳夢吉：呢便呀，洪兄！唉！乞兒即系乞兒，有勇無謀不特止，三句唔埋就動刀槍。家嚇請你飲尿經已算畀面架嘞。重嚟？兜口兜面架嘞。
（鏡頭轉向野外眾人大便的情節。。。。。。）
一丐：大佬！大佬！唔掂呀！我攋「缽缽焦」啊！
洪十八：我都急到攋呀！
一丐：幫幫我，唔好走呀！
（阿歡同陳夢吉喺草叢中蒲頭）
阿歡：嘩！班友仔飲咗我哋加咗瀉藥嘅尿，呢次重唔屙鑊甘！
陳夢吉：噓！（示意身後一人行動）
一人：好慘呀！好慘呀！（向上拋搽咗啲嘢嘅溪錢）
一丐：喂，大佬！怕唔怕邪呀？
洪十八：你用手指系用溪錢吖？
洪十八：你哋覺唔覺得喺肛門嘅深處，痕癢難當，好似俾針拮俾蟲咬嘅感覺呀？
（眾人點頭）
洪十八：又俾陳夢吉算到！
（突然一張紙條飛過來，大家驚慌失措）
洪十八：唔使驚，冇屎架，有字啫！
幫眾一：洪十八你條契弟，先前清潔肛門所用嘅溪紙全部搽滿四川劇毒世家嘅「萬毒蟻咬油」。痕起上嚟一系唔拗，一拗就拗到唔停得手，直至肛門爆裂，血流成河為止。
洪十八：點解你讀信，個口唔喐，有聲嘅？不過把聲又唔系你喎？
（陳夢吉突然從後面出現）
陳夢吉：因為有我陳夢吉旁白，點呀？痕唔痕呀？哇哎！有蚊！咦，好痕！唔拗點得架！
阿歡：準備，一二三四！好痕吖！好痕呀！好痕吖！好痕呀！啦啦！啦啦啦！快啲搽啲「無賴膏」。嘿！「無賴膏」嚟喇。
（陳夢吉搽咗一浸）
陳夢吉：唔該！
洪十八：陳夢吉我認輸嘞，（洪十八跪下）畀解藥我哋啦！
陳夢吉：得！由於時間關係我已經嗌埋李公子嚟幫手做見證，嗌聲我契哥先啦！
洪十八：契……契……
陳夢吉：李公子百忙中抽時間嚟幫手，真系唔話得呀！
李公子：鬼叫你有女咩！
陳夢吉：有冇你心先？
李公子：喂，快啲囉喂！
洪十八：斬對手都唔衰俾你睇！（洪十八舉刀想斬自己手落嚟，陳夢吉搶過洪十八手中嘅刀）
陳夢吉：不愧為一條頂天立地嘅漢子，你嗌我契哥我唔睬你架嘞。歡！
阿歡：系！！由於時間關係，我哋已經準備咗啲解藥，俾各位慢用架嘞。
洪十八：銀兩？
陳夢吉：呢一錠銀你愛嚟塞入肛門，手指不能進入咯，咪拗唔到囉。（洪十八拿住銀兩）
陳夢吉：好！！佢諗都唔諗就啪入去，不愧為一條蕩氣迴腸嘅漢子。抵惜！！！
陳夢吉：歡！
阿歡：系！哎！師父同你講笑架啫，呢啲銀兩系畀你買二錢川貝，三錢伏地，四條夏枯草，四碗水煎埋一茶匙，然後潤入肛門患處，自然藥到病除，七日之後呢，包好，痕癢即消，重滋潤肛門皮膚添！
陳夢吉：派銀兩！洪兄請起，我陳某敬重洪兄你系一個可歌可泣嘅漢子，冤家宜解不宜結，如今香港九龍新界，落入西人之手，所謂國難當頭，你我好應該拋開私人恩怨，結為金蘭兄弟，團結對外吖！而家我自認契弟，自懟一杯，嚟！
洪十八：你就想，我嬲你一世嘅，不過我都服你，契弟！走！
陳夢吉：歡！得饒人處且饒人，你學到冇？
阿歡：學到呀，師父！
李公子：哦，贏得咁漂亮重大講風涼說話，我服得你好緊要喎。
陳夢吉：服就請跳舞呀！
李公子：喂！又我？
阿歡：嗨，唔使請呀？
李公子：嗨，噉就跳咯！喂，行咯！

陳夢吉獻計
（李公子同其他兩位公子夾份開嘅酒樓，冷冷清清，檯面有四個人：陳夢吉，李公子，公子一（雷宇揚），公子二（張達明））
公子一：喂，橋王呀，唔好夾住，考嚇你吖，黑貓系黑色，白貓系白色，噉熊貓系咩色呀？
陳夢吉：哇！估死人咩？
公子一：哈哈！嗱，好多人以為熊貓系紅色架，其實熊貓系黑白色架。
陳夢吉：系喎！（非常驚訝之表情）
公子二：再考你，一點一劃長，牆上甭支槍，阿木對阿木，阿公冇咗一忽肉。繫個咩字？
陳夢吉：嗚——，畀啖粥食好喎！
公子二：考起吖咧！個答案就系——中文字。好多人以為系英文字嚟咖。
李公子：啊！好嘢嚟喎。
李公子：難得咁高興，橋王不如又整條好橋聽嚇咧。
陳夢吉：冇橋，冇橋，冇橋。靠把口搵飯食，真系有橋使坐喺度振咩？食嘢食嘢！
三人：你橋王嚟架喎，整條橋聽嚇啦。有嘅！有嘅！……
（有人托嚟一盤金擺喺陳夢吉面前）
陳夢吉：乜料？
公子二：人哋話陳夢吉算死草，現實勢利，真系咁現實，唔見錢唔開口講橋喎。
李公子：我哋三個有錢靚仔呀街知巷聞架啦。
陳夢吉：鬼死咁靚添啦！
李公子：咪囉！靚到鬼死噉樣樣開間酒樓，居然冇人幫襯喎。等阿陳兄你嚟度條好橋開嚇客路咧。
陳夢吉：家嚇大家把酒言歡，唔使真系度橋呀！
公子一：真系有性格，講錢就傷感情。不過噉喎陳兄，我哋幾兄弟同你冇乜感情好講，都講錢直接啲。
陳夢吉：啊！你都算挑通眼眉。就噉，換過曬啲女佢，請啲似返個人樣嘅嚟至為之首要呀。
公子二：已經幾勻架喇。
李公子：最索呢班架啦。有目共睹架！
公子一：阿橋王呀！你啲橋咁屎，你不如叫屎橋王吖。屎橋王！
陳夢吉：睇嚟幾位有啲要求架喎！啊！噉呀！噉呀！噉呀！
（將公子二叫到身邊，將佢一腳從三樓踢落去，圍觀嘅人擁入酒樓）
李公子：弊喇，啲生意真繫好起嚟添。
公子二：喂，噉咪請多幾個夥計返嚟招呼客人至得呀！
陳夢吉：好奇之心人皆有之，你哋三位一定要緊記架，每日三更準時輪住嚟跳樓仆街，吸引到班客人嘅注意力囉喎，財源自不然乒呤唪冷滾滾來吖。
李公子：但系大嗱嗱三樓跳落去好危噃！
陳夢吉：（一路落樓一路講）搵食呀兄弟！七樓都焗住跳啦。
李公子：噉又系！噉又系！
陳夢吉：檯面銀兩唔該送去我屋企。
李公子：好呀！
　
同方堂鏡鬥智
陳夢吉：歡嗱！歡！歡嗱！（搵到阿歡，阿歡睇緊公仔戲）撇嘞！
（阿歡冇唔到陳夢吉，一味睇戲）
阿歡：哎吖，做得真好呀！
陳夢吉：作反嗱你？及嘢唔嗌我？
阿歡：呢個盞鬼吖！盞鬼！盞鬼！（以為水蓮花對住佢笑，同陳夢吉話）佢對住我笑呀，師父。
陳夢吉：你錯喇，佢對住我笑呀。
阿歡：唔系呀，佢對我笑啊，師父，喂，哎呀！
（陳夢吉上前唔小心掂到水蓮花）
陳夢吉、阿歡（扮曬嘢噉）：發財！嘰嘰喳……碰碰啪……
水蓮花：系咪你兩個摸我八月十五？
（噓聲四起）
陳夢吉：開！
阿歡：十！
陳夢吉：開！
阿歡：十！
陳夢吉：開！你嘅！你嘅！
水蓮花：系咪你兩個摸我八月十五呀？
陳夢吉：飲！我陳夢吉以人格擔保，絕無其事。撇嘞！
水蓮花：咪走住！
陳夢吉：小姐！嗱，捉賊拿贓捉姦在床。無憑無據嘢冇立亂噉講得架。撇嘞！
阿歡：師父啊師父，為咗佢宜家好落台啲，不如我認咗佢。我畀返個八月十五你摸補返數呢。
陳夢吉：噉又抵喎。
（方堂鏡突然殺出）
方堂鏡：賤格！賤格！賤格！賤格！
陳夢吉：方堂鏡？
方堂鏡：陳夢吉，你兩師徒堂堂男子，公然調戲弱質女流？而家你重偷食唔抹嘴呀，重喺度猜埋啲麼心麼肺嘅廢枚。天理循環，公道人心，何在！？
陳夢吉（對阿歡）：呢個混蛋自從上次打牌畀我截咗鋪清一色自模爆棚之後，一直懷恨在心，起勢搵位入我。
阿歡：就系佢嚇嘩？
方堂鏡：姑娘，未請教。
水蓮花：弱女水蓮花。
方堂鏡：我方堂鏡今日，就代姑娘為民除害！
陳夢吉：老友，唔啱大家坐低……
方堂鏡：你唔使講嘞，同我帶拉茜出嚟！
阿歡：神犬拉茜？
方堂鏡：神犬拉茜系經過地獄式嘅嚴格訓練，憑疑犯條汗毛呀，追到落天腳底，佢就唔擔住個疑犯，佢都唔會罷休嘅，而家示範一次。（將條雞毛喺拉茜面前擺嚟擺去）冧佢！
（拉茜撲埋去隻雞度，隻雞冇幾耐就俾整死咗）
（拉茜聞水蓮花籮柚）
方堂鏡：水姑娘，唔使驚呀！我叫拉茜聞嚇你屁股咋。鎮定啲呀！
阿歡（驚）：師父，陣間有乜依喐我返去班馬，你頂得一陣就一陣呀。
陳夢吉：怕你呀？嚟呀！（楂住只茄）
方堂鏡：（手指陳夢吉）冧佢！
陳夢吉：拉茜乖，拉茜乖，原來鍾意食叉包啊。哼！（舉起一粒鈕喺方堂鏡面前）
方堂鏡（摸自己衫，發現唔見咗粒鈕）：大鑊！
（拉茜撲埋去方堂鏡嗰度）
陳夢吉：原來賊喊捉賊，摸人籮柚者正是方堂鏡本人也。
阿歡：今次真系水落石出嘞嚇！（鼓掌）
陳夢吉：佢亦都勢估唔到經過一手訓練嘅拉茜會喺最決定性嘅一刻俾我嘅正氣所感染而良心發現調轉狗頭大義滅親。拉茜不愧為神犬中嘅神犬。我嚟齊聲為佢歡呼。拉茜好！
阿歡、眾人：拉茜好！
陳夢吉：好拉茜！
阿歡、眾人：好拉茜！
陳夢吉：中國出了一條好狗叫拉茜！
阿歡、眾人：中國出咗一條好狗叫拉茜！
陳夢吉（嚟到水蓮花面前）：小姐系咪有嘢同我講呀？
水蓮花：幾乎錯怪咗鼎鼎大名嘅陳狀師。我真系有眼無珠。差啲重俾個衰人呃。
陳夢吉：噉搞法你欠我一個人情喎。
水蓮花：我希望有機會可以報答。
陳夢吉：呢個我徒弟阿歡嗱。
水蓮花：歡哥！
陳夢吉：佢好愛你架。
阿歡（好怕醜噉攞把扇遮住塊面）：師父，衰架。師父。
陳夢吉：但系你唔使愛佢架。噉啦，聽日下晝三時，準時到我府上，就報答一事共同商議。你意下如何呀？
水蓮花：聽日準時到府上。
陳夢吉：撇！
阿歡：撇！
　
香港冠春園驗屍
（爵士開棺驗屍）
一工人：少爺，搵到嘞。
何中：爹哋，搵到嘞。
何西：天父，求你保佑我如花同埋念西喺天堂安安樂樂，你一定要幫我。
何春：啊，爵爺，風寒嗱，呢度等我嚟搞得嘞。
何西：中，開棺驗明正身。
何西：屍首保存成點呀？
何中：重可以見到面目。
何西：你反轉阿念西，除咗佢條褲呀。
（何中踎低）
何西：見到咩呀？
何中：屁股。
何西：屁股有咩呀？
何中：一個等邊三角形嘅屍斑。
何西：系胎記。冇錯，佢就系你細佬阿念西。
（工人、何中同何春三人一齊點頭，有古怪）
（一尼姑庵）
何春（扐出一張銀票畀尼姑，尼姑起勢掹咗幾下掹到張銀票，收入袖中，虛偽）：其實，念西經你手賣去廣州成二十年。如果重尚在人間，認唔認得佢吖嗱？
尼姑（轉身）：人嘅嘢，飽歷滄桑一個樣，快樂開心一個樣。變成點，我唔敢擔保。
何春：噉重有咩記認呀？
尼姑（轉身）：帶佢嗰陣時，佢身邊有個好靚嘅玉吊墜。吊墜有小門，門後便有你哋何西爵士嘅西字。
（何春懟冧咗尼姑）

佈置機關失敗
陳府
阿歡（托住盤花）：師父，你搞緊咩呀？
陳夢吉：等等先。
阿歡（食緊飯）：師父，你喺度搞緊乜嘢呀？（陳夢吉閂咗度門，阿歡企喺門口）
陳夢吉：等等先。
（陳夢吉出嚟）
阿歡：師父！
陳夢吉：哇！阿歡，你發達喇！
阿歡：咩呀？咩呀？咩呀？
陳夢吉：水蓮花畀你錫，你制唔制？
阿歡：唔系吖嘩，師父？噉益我？
陳夢吉：乜唔系吖？陣間阿水蓮花嚟到，我叫阿仁帶佢坐喺呢張凳度（拖住阿歡嚟到一隻椅旁邊）跟住阿仁逼力伏盧噉走去斟茶。死未？
阿歡：哎呀！冇死喇！
陳夢吉：醒咧？
阿歡：即系點解呀？
陳夢吉：坐啦！
（阿歡坐低，椅腳斷咗，一樽瓶水淋落阿歡個身度）
陳夢吉：水蓮花成身濕曬，噉點呀？
阿歡：佢會肉酸同嗌囉！
陳夢吉：非也，非也！佢會換衫。
阿歡：大庭廣眾點換呀，師父？
陳夢吉：你睇！（手指向一間更衣室，帶阿歡入去更衣室）
陳夢吉：此門一關嗱就自動反鎖架，同時此寵會有一水柱射出，根據人類嘅本能反映，水蓮花會——
阿歡：搵只手指塞住佢！
陳夢吉：說時遲那時快，亦有一水柱由此寵射出呀。
阿歡：噉佢又搵手指塞住佢囉！
陳夢吉：水蓮花勢估唔到，原來重有一大水柱由此大寵射向佢面嗱。
阿歡：唔系咁古怪啊嘩，師父！
陳夢吉：水蓮花無端端落得如此坎坷下場，所謂叫天不應，叫地不聞嘅，勢必都嚇至五官移位，六神無主，為求自保呀，系人都知道佢會——
阿歡：搵條脷塞住佢。
陳夢吉：如是者，你就企喺更衣室對面呢房間，到時到候掹咗條水喉，伸條脷過去。
阿歡：吖！噉我就錫到嘞師父！（表情興奮）
陳夢吉：預咗嘞嘛，當三個鋃鋃搖呀搖嘅時候，你就嘴啦。
阿歡：但系嘴佢有咩用呀，師父？
陳夢吉：喂，你唔系噉玩我嚇嘩，歡哥？
阿歡：師父呀，萬一佢咬我我點算呢？
陳夢吉：你嘴得佢冧呀，佢點捨得咬你呢？
阿歡：哎吖，師父，你真系對我好嘞，師父！
陳夢吉：有冇你心先？
阿歡：有！
（陳夢吉閂埋門出去搵阿仁）
陳夢吉：請企喺此房間，切勿離開，將會有一大水柱由此寵射向你面之際吖，請將此豬脷塞向此寵。明解冇？（拿出豬脷交畀阿仁）
阿仁：明解。
陳夢吉：講次聽嚇。
（阿仁粒聲唔出，面懵懵）
陳夢吉：吆！陣間有條老練咁大嘅水柱，喺呢個寵度射到你個冚家鏟一面都系嘅時候呢，你就將呢條仆街豬脷塞落去你老美呢個寵度呀。
阿仁：哦！早講呀你！
陳夢吉：賤格。
（陳夢吉想像錫水蓮花嘅情景……）
陳夢吉：順一次先。順一次先。阿歡喺隔籬房錫阿仁楂住嗰條豬脷，我就喺呢間房錫阿水蓮花條脷。萬一追究起上嚟咯噃，阿歡就會自認嘴咗水蓮花。水蓮花大巴大巴扇阿歡，我再上前撴多佢兩腳。水蓮花撲向我懷抱，我即刻安慰佢，承機再灌醉佢。然後我就——殺！哈哈哈——！當今世上橋王之王捨我其誰！之乎者也！哈哈哈 ——！
鏡頭轉換：（屋內傭人搊住大把行李，呂忍同一女客（蘭西）突然喺英國返嚟）
陳夢吉：搞乜咁多行李呀？搬屋呀？
女傭：唔系吖，少奶返咗嚟吖嘛。
陳夢吉（憟憟地）：少奶……。
女傭：系吖，重同個朋友入咗偏廳呀。
女客人：你咁大間house，one chair only？！
呂忍：哦，你系客人嚟架，你坐啦！（女客坐低，椅腳斷咗，俾淋咗一身）
女客人：Oh, shit!
呂忍：真系唔好意思呀！你去換衫先嗱。
陳夢吉：喂喂喂，你咪呀你呀。
呂忍：老公！
陳夢吉：唔系你吖。哨牙嗰個呀！（同女客解釋）即系呢間房呢……
女客：Ok，你趕。You first!（閂咗間房，陳夢吉俾困喺間裡邊）
陳夢吉：弊喇。（伸手去塞住牆上便出緊水嘅寵）救命呀！救命呀！救命呀！救命呀！……
（鋃鋃開始搖，阿歡見到以為到時候嘞）
（阿仁將條豬脷塞入個寵度，阿歡掹咗水喉，見到條豬脷）
陳夢吉：救命呀！救命呀！……
（阿歡掹咗條脷，好驚噉衝出去）
阿歡：哎呀，搞出人命呀！哎吖！死喇！師父！師父呀！死喇！（見到呂忍）
呂忍：阿歡！
阿歡：師母！搞出人命，冇嘢架。水姑娘呀，我畀條脷你，我對你唔住呀，我冇心架……
（水蓮花出現）
水蓮花：對唔住呀，我嚟遲咗。
阿歡：啊！咁猛嘅！鬼吖！（撻低）
女客：What's going on?
呂忍：好混亂。組織唔到。
陳夢吉：救命呀！救命！救命呀！
　
飯台解釋
（飯桌上，幾個人安靜的圍座是桌上。人物：陳夢吉，呂忍，阿仁，阿歡，水蓮花，女客人）
陳夢吉：阿呂忍！
呂忍：點呀，老公？
陳夢吉：我明明供你到英國讀法律，點解霎時間跑返番嚟呢？（表情嚴肅）
呂忍：畀個驚喜你噉啫！
陳夢吉：哇！好驚喜喎，食飯喇。
呂忍：話時話嘞，正話因乜事幹你會俾啲水啡咗出間房嘅？我又見四周圍都佈置曬咁多機關，唔知你得唔得閒就呢件事幹發表一下你嘅個人意見呢？
陳夢吉：得就好得閒！但系就——唔系咁方便講！
阿歡：哎！師奶，你錯怪咗師父嘞，查實師父呀看出徒兒有禽獸嘅慾念，所以布下了天羅地網，好使徒兒有機會呢一親水姑娘嘅香澤，唔好誤會師父呀。之不過師父，至於呢條豬脷，你又方唔方便解釋一番呢？（扐出條豬脷）
陳夢吉：方便系方便，但系——唔繫好得閒喎！
呂忍：噉咪好咯！就算你得閒講，我哋都未必得閒聽！
陳夢吉：（放低碗，深呼吸一啖）歡！條豬脷你舐過咧？
阿歡：有舐過！
陳夢吉：系喇，就系買嚟畀你舐架！
阿歡：（盯）師父！你當初同我講話舐水姑娘條脷架噃？
陳夢吉：查實水姑娘條脷就我想舐，嗰條豬脷嗌嚟俾你舐，我跣你，標你松柴，過你一戙，點吖？（咬牙切齒）怕乜講呀？怕乜講呀？天口翳焗，生活又枯燥，搞少少把戲嚟調劑一下，噉得唔得？
呂忍：噉咪得囉！
陳夢吉：得咪就得囉！
（阿歡睥住陳夢吉）
陳夢吉：啋過你呀！睥到咁拫？（拍拍阿歡的肩膀）以我同你嘅交情，點都留返過你嘴嘅，嗱你問嚇佢吖！（手指向水蓮花）
水蓮花：告辭嘞！陳夢吉，既然你有婦之夫嘞，你做咩重約我返嚟食飯吖？我會誤會架，你有冇諗過我嘅感受呀？有才華唔系大曬架。（講完走咗去，阿歡追出去）
阿歡：嗨！水姑娘！
女客人：Very simple! 佢就暗戀佢，佢就跣佢，佢又想嘴佢，你就嬲佢。
陳夢吉：（睥住女客）我想鍾你添！
　
阿歡出走
（水蓮花衝出陳家，阿歡拎住燈籠追出去）
阿歡：小草！借借先。
阿歡：水姑娘……水姑娘，請停嚇，水姑娘，請停嚇，請停嚇，水姑娘，路黑呀，我送你一程呀！
水蓮花：唔使嘞，你借個燈籠畀我，我下次還返畀你。
阿歡：下次？噉我即系重有機會見到你囉？
水蓮花：如果可以唔還就最好嘞，我得唔到佢個人，得唔到佢嘅心，得到個燈籠都叫做有返啲紀念囉！
阿歡：水姑娘呀，因乜解究你咁鍾意我師父架呢？
水蓮花：每個女人，都希望搵到一個叻過自己，能夠保護到自己嘅男人。
阿歡：水姑娘，如果有個男人，叻你唔繫好多，但系保護到你，唔知你又會唔會考慮噉呢？
水蓮花：良禽擇木而棲，如果我搵唔到好老公，寧願自梳唔嫁。
阿歡：果然堅貞，絕非淫娃蕩婦，好料！
水蓮花：歡哥！男兒志在四方，兒女私情你都系暫時擺埋一邊！你重咁年輕，好應該出去闖一闖！
阿歡（沉思，突然電閃雷鳴）：闖一闖？我去邊處闖呀？奶奶！
（陳夢吉間房）
陳夢吉：系咪真系興咖？
呂忍：系吖。
陳夢吉：系咪咖？
呂忍：睇嚇。
陳夢吉：乜而家英國興啲噉樣喐架咩？
呂忍：點樣喐呀？
陳夢吉：噉樣喐囉。
呂忍：你有喐到咩？
陳夢吉：我有喐，呢個喐呀。
呂忍：Look!
陳夢吉：你家嚇英語能夠講到柏柏聲，真不枉我當年送你去英國攻書教學呀。
呂忍：你都不枉我千山萬水帶呢套禮物返嚟畀你啦，你睇你著起靚仔咁多。
陳夢吉：聾嘅都聽得出你呢句說話系真心架噃。
呂忍：噉都俾你識穿添，你真系我肚裡便一條蟲。
陳夢吉：你噉樣講嘢重好浪漫添。（轉身）哇哇哇，夜嘞，就寢咧。
（兩人萬分禮讓）
陳夢吉：你先。
呂忍：哦，你先嗱，你先。
陳夢吉：唔好，唔好，你先，你先。
呂忍：哦，唔好唔好，唔好客氣。
陳夢吉：唔系客氣咧，我真系唔敢，我真系唔敢。
呂忍：唔好噉啦，當畀少少薄面我。
陳夢吉：唔系咧，我……我唯有恭敬不如從命。
（夜晚陳府門口，人物：呂忍，阿歡）
呂忍：唉，我諗我老公唔鍾意我，我哋成咗親七年，我又去埋英國一年，佢而家連講嘢都唔望我。冇辦法嘞，唯有連我都講嘢唔望佢啦！
呂忍：喂，歡嗱！其實佢送我去英國讀法律呢，我讀咗第二樣嘢。
阿歡：讀咗咩呀？
呂忍：Fashion design.
阿歡：咩「嘥」話？
呂忍：針織咯！
阿歡：哎！真系天外有天，人外有人，個世界真系大變，針織都有得過去讀架！
呂忍：所以你應該出去外便闖嚇世界，見嚇世面囉。
阿歡：系！師奶一言驚醒夢中人，男兒志在四方，雖然我遠嘅地方唔去，近近地落個香港都要嘞。
（陳夢吉家大院，人物：陳夢吉，阿歡）
陳夢吉：喂？你落香港？
阿歡：系吖，師父！
陳夢吉：香港系殖民堤方唔系人住咖，系西人住咖。
阿歡：我理得佢呀，邊個搞我，我打鑊佢。
陳夢吉：哦！噉呀得。
阿歡：你唔好理我吖。
阿歡：我儲喺你度嗰啲人工，你方便架話，唔知幾時……
陳夢吉：講咩呀？
阿歡：我儲……
陳夢吉：之前嗰句？
阿歡：冇呀！
陳夢吉：叫我唔好理你？刮，very 刮! 你話咖！（手指向阿歡）
鏡頭轉移：（夜晚飯桌前，人物：陳夢吉，阿歡，阿仁。呂忍）
阿歡：師父呀！雞子，啱你架！（夾餸畀陳夢吉）
陳夢吉：添飯！
阿歡：我嚟我嚟！師父，飯。
陳夢吉：冇人知我減緊肥咩？（大家搖頭）飯要一半啊！
阿仁：哦。
阿歡：等我嚟，等我嚟。
陳夢吉：衰仔，爛泥扶唔上壁！
阿歡：一半呀嚇嘩？（將飯倒喺檯面，用手將飯分開兩半）天一半，地一半，一半呀！食喇！
陳夢吉：喺我個場，你夠膽噉樣叫做系竄我噉話咯喎？
阿歡：又話唔理我？（用手厾陳夢吉個頭）你輸咗嘞，陳夢吉！
阿仁：家和萬事興呀，師父！
陳夢吉：收聲！喺我個場幾時輪到你講嘢？
（陳夢吉手拿香，行到一盞燈前）
陳夢吉：我陳夢吉家嚇向住燈火發誓，唔再理阿何歡，若然有反悔嘅，當受法律所制裁呀。
阿歡：你系唔理我啦嘛？
陳夢吉：哼！
阿歡：你系唔理我啦嘛？
陳夢吉：哼！
阿歡：自私精，冇血性，性無能！
（兩人打起上嚟）
陳夢吉：仆街仔你，你仆街仔你！你仆街仔你！你仆街仔你！
阿歡：滾我啲錢。（一拳中落陳夢吉鼻樑，陳夢吉即場暈倒）
阿仁：出去避避先吖。
阿歡：避避？仁，保重呀！（走佬）
（陳夢吉夢中驚醒）
陳夢吉：我唔系性無能，我唔系性無能。我唔系吖——！
呂忍：老公，點呀你？發夢咋嘛。
陳夢吉：阿歡話我冷血兼自私，系咪真架？我好孤獨，英文點講？
呂忍：I love you!（好深情噉望住陳夢吉）
陳夢吉：（緊握拳頭，表情痛苦）I love you!
呂忍：真嘅？
陳夢吉：I love you!I love you!!I love you!!!I love you!!!!I love you!!!!!
（阿歡叩響水姑娘間屋度門）
水姑娘：咁夜咩事呀？
阿歡：水姑娘，陳夢吉正烏龜王八蛋嗱，我同佢咁多年佢都噉對我呀，更何況對你？
水姑娘：冇其他事嘞呵？
阿歡：啊，水姑娘，水姑娘，查實你年紀都唔細架啦，呢處我有個玉珮畀你楂手。嗱嗱聲入去執兩件衫，拉我一齊落香港罷啦。你……唔呀？
水姑娘：香港路途遙遠，你都系搵個玉珮傍嚇身啊。萬一遇到山賊，都有嘢畀人偷，唔會攞你命呀。時候唔早嘞，你上路啦。小心啲喇。（返入去）

阿歡惹官司
（香港荷裡活道 某古玩店）
何春：少爺！（扐阿歡買咗嘅玉珮畀何中過目）
何中：個賣主而家喺邊呀？
（香港會所）
（響起一聲槍聲，何春扒喺地度奄奄一息）
阿歡（楂住槍）：唔關我事呀，我唔識開槍架。
（何中匿喺暗角用槍殺死咗何春，阿歡俾人拉走）
阿歡：我冇殺人，我冇殺人，冤枉呀大老爺。（俾帶去一個地方）西人？
西人：You murderer!
阿歡（問一手足）：阿叔呀，佢想鬧我咩呀？
（阿歡受到各種刑罰嘅糟質）
阿歡：救命！你系咪同我玩楊乃武先呀？拆祠堂呀！
一手足：而家我哋告你謀殺，你可以自己搵律師幫你辯護。你有冇律師呀？
阿歡：有。陳夢吉。
（呂忍喺報紙度見到阿歡喺香港惹咗官非）
呂忍：Shit!
（某寺廟）
一僧：施主，你得未吖？
阿仁：搵到嘞，搵到嘞。搵到師父嘞。
呂忍：好！行！（帶住一班徒兒去寺廟搵陳夢吉）
一僧：剃刀一落，寸草不生。冇得返轉頭架嘞施主。
一僧：唔好反悔喎
陳夢吉：嚟吖！
（原來系剃胳肋底嗰啲毛）
呂忍：唔好剃啦。
陳夢吉：胳肋底生虱，做少少手術都唔准？喂，畀條路行嚇好喎。
一僧：施主，繼唔繼續剃呀？
陳夢吉：剃吖，唔該。
呂忍：阿歡喺香港惹咗官非吖。
陳夢吉：啊？咦？喂？
呂忍：噉你去唔去救佢啫？
陳夢吉：點救？
呂忍：你唔救佢會死架嘞喎。
陳夢吉：人生自古誰無死！
呂忍：噉叫得你橋王，
陳夢吉：冇橋，冇橋。佢而家喺香港犯事，用嘅系大不列顛法律，冇橋。
呂忍：喂，你送我去英國讀法律，噉或者可能斷估我可以幫到你少少呢我之前……
陳夢吉：講話好拗底喎。
呂忍：喺你面前我叻咩啫
陳夢吉：噉睇嚟我要幫你嘞。
阿仁：師父！師父！
眾人：師父！師父！（齊齊舉手）
（阿歡俾韞喺監獄）
獄監：放飯嘞。
阿歡：喺邊度放飯，師兄？
（獄監派食物）
獄監：你新嚟呀？
阿歡：系吖，系吖。
（阿歡俾獄中鬼佬掐）
獄監：遊戲時間。（阿歡俾鬼佬埋喺沙裡便）
阿歡：你唔好蝦我呀，我師父好叻架。
（香港 李鴻章駐港辦事處）
李鴻章：何歡一案，中英政府已經達成協議，以英式法庭審訊，速判速決，不設上訴。另外，特許爭取到成狀師代表被告辯護。
陳夢吉：呢層在下一早知嘞。
龍二哥：另外，李鴻章大人話，能夠為何歡洗脫罪名嘅就系民族英雄。富貴榮華，指日可待。恭喜！
陳夢吉：哈哈哈——，萬一場官司打輸咗，唔使罰企吖嘩？
龍二哥：噉即系有辱國體，輕則抄家，重則株連九族，冚家富貴。
陳夢吉：噉即系擺我上台啫。
龍二哥：噉你又唔使咁灰氣，唔夠凳坐啫。
　
探監
（香港監獄，人物：陳夢吉。呂忍。阿歡。）
陳夢吉：點會噉架？（看著歡的頭型）點會噉架？？你喺邊度剪嘅啫？
阿歡：（表情哀傷）彌敦道九號！
陳夢吉：頭嘅嘢你唔系見人哋剪你又發姣發躉走去剪架，要襯架！你睇嚇你而家髮型完全唔襯你個面型。個面型又唔襯個身型，個身型又撞返曬個髮型，系撞到唪唪聲呀歡哥！噉你而家究竟想點嘅啫你究竟？
阿歡：（哭泣著抱住陳夢吉的腿）師父！我知錯嘞，你唔好再講嘞，我剪咗呢個頭髮之後好後悔啊。
陳夢吉：坐返低先！坐返低先！講返成件事，你由頭到尾再講多次。
阿歡：好！嗰日一個人行彌敦道，行到去九號，噉有個肥婆向我揮手，噉佢同我講話，斗零剪個頭啊，哥哥仔。噉我咪去剪咯。
陳夢吉：所以話好嘢冇平，平嘢冇好，你而家知錯未吖？
呂忍：我哋爭取時間講返件案好唔好呀？
阿歡：噉案發當日呢，我如常返香港會所舞北獅囉，舞完北獅去到後台。突然間有人攞個米袋笠住我個頭，擁我去後便，噉我咪掙扎咯，掙扎，掙扎，突然之間混亂之中，有人喺後便除咗我條褲咯。
陳夢吉：噉你有冇俾佢——？
阿歡：有啊！
陳夢吉：痛唔痛呀？
阿歡：唔痛。
陳夢吉：爽唔爽呀？
阿歡：唔爽，俾人除咗條褲睇到個籮柚，淨系涼一涼噉囉！
陳夢吉：跟住點呢？
阿歡：跟住？跟住我嚟掙扎囉，我一除開個米袋，見到佢攞住支槍對住我囉。
（回憶案發當日經過……何春屈阿歡勾自己老婆，何春俾人喺暗角攞槍射死）
阿歡（反抗）：你想點呀？鹹濕佬。你想點呀你？
何春：你勾我老婆，重惡人先告狀。
衝入嚟嘅幾個人：唔好殺我哋呀！唔好殺我哋呀！
阿歡：唔關我事啊，我唔識開槍架。
……
陳夢吉：噉得嘞，即系話有人匿埋喺暗角開槍打死何春，然之後嫁禍畀阿歡，但系關鍵系你有冇勾何春個老婆？
阿歡：師父！我連何春個老婆系點樣我見都未見過，我點勾佢老婆呀？
呂忍：何春分明系亂噏啦，但系點解佢會俾人擸低呢？
陳夢吉：噉得嘞，關鍵就喺你個籮柚度。
（阿歡除褲）
陳夢吉：哎？呢個等邊三角形系咩嚟？
呂忍：胎記嚟架！
陳夢吉：胎記？
呂忍：嘩！阿歡你好熱氣喎！幾多粒粒。
阿歡：少少噉喇，師母！
呂忍：跌嘢喎！啊？牌九嚟架喎！
陳夢吉：歡哥，噉即系算點呀？
阿歡：啊，呢啲叫通櫃吖師父！喺度踎監呢新嚟嘅犯人要幫啲紅毛鬼吖，印度鬼收埋啲娛樂賭具，跌一隻就塞多只架。啊，勞煩師父你可唔可以幫我塞返入去噉呀？
陳夢吉：啊！橫掂都系塞咯，我呢就帶隻雞髀嚟過你，噉不如擺埋入去！（拿出雞腿）你見肚餓嘅時候再攞出嚟食啦好嗎？
阿歡：都好呀，師父。
陳夢吉：嚟！（將雞髀啪入去）
阿歡：好，多謝師父！
陳夢吉：客咩氣呀？以我同你噉樣都重講啲噉嘅嘢咩？唉！弊嘞，我啪埋去戒指入去裡便添。歡哥，方唔方便囤返只戒指出嚟過我呀？呢隻雞髀嚟咋喎。戒指重喺裡便，歡哥。
阿歡：唔系咩？哦！太多嘢嘞。師父呀，勞煩你自己抄一抄呀不如。

打官司前準備
畫外音：因為法庭嘅規例，雖然陳夢吉唔系自願受洗。但繫好歡迎佢信奉天主。（陳夢吉差啲俾浸死，好在龍二哥救佢）
龍二哥：放咗佢。
陳夢吉：哇！頭先條女系噉意浸浸，乜啲仔要浸咁耐咖？咦，做乜打交呀？鼻血都流埋。
龍二哥：冇打佢啊。
神棍：唔關佢事，你睇嚇。
（前面一排鬼妹，全部個身濕曬，好性感）
陳夢吉：超！鬼妹啫嚇嘩？我至憎添啊。（自己都流鼻血）
龍二哥（流鼻血）：都還可以喎。
（洪十八同眾弟子入獄）
洪十八（教訓紅毛鬼一餐）：通你娘親個櫃喇。收返自己副牌九。重有啊，收埋我副麻將，麻將檯凳全套。
紅毛鬼：What?（俾爆打）
阿歡：多謝洪大哥。
洪十八：多咩謝呀？陳夢吉叫到，我實睇住你咖。大力啲耷佢。
　
官司第一堂
（香港最高法院：人物：主控官，陳夢吉，呂忍，陪審團，法官……法庭爆棚）
手足：Court!
阿歡：我師父，巴閉。我師父，好犀利。
法官：請大候選陪審團出嚟遴選。張鐵生先生，你系殘廢人士。本席豁免你做陪審員嘅義務。
張鐵生：Objection.
法官：你又Obje乜嘢？
張鐵生：歧視傷殘人士系有違法律精神嘅行為，我張鐵生雖然雙目失明。但系一直以公正嚴明明辨是非嘅心處事。做陪審員系我嘅宏願。如果你唔畀我做，我就投訴你。
法官：好呀。我畀你做。
張鐵生：多謝。
（辯方陳夢吉同呂忍）
陳夢吉：又有陪審團，又有法官，九十幾人，究竟邊個話事架呢嚇？
呂忍：系吖！
陳夢吉：你答咗我架嘞嚇嘩？
呂忍：好呀！
法官：主控官！
主控官：各位陪審員，喺未來呢幾天裡便，我將會喺你哋面前展露人性最醜惡嘅一面，呢一宗系一宗聽後令人毛骨悚然，喪盡天良嘅蓄意謀殺案：被告何歡，同受害人何春嘅妻子顏如玉有染，佢唔單止淫人妻，重處心積慮想完全佔有顏如玉，於是約何春出嚟將佢殺害。顏如玉至今下落不明，我哋系有理由相信，亦都同遭被告殺害嘅。我哋深信全能嘅上帝，因為佢系公義嘅，呢一度系法庭，系佢彰顯公義同何春申冤嘅地方。
（好多口水噴落陳夢吉身上）
陳夢吉：高手嚟喎！
法官：辯方！
陳夢吉：法官大人，請准問陪審團幾個問題。
法官：咩問題呀？
陳夢吉：相當重要嘅問題！
法官：你問呀！
陳夢吉：陪審團，若然有覺得被告靚仔嘅請舉手！（全場冇動靜，除咗阿歡自己舉手）有覺得被告唔靚仔嘅請舉手！（冇動靜）有認為被告極度樣衰到非常嘅請舉手！（全場人全部舉手）
陳夢吉：各位，被告樣極衰，錢亦極冇，何其甩皮甩骨呢有目共睹嘅，試問有捻本事去勾引一個香港大富家族嘅總經理太太呀又？
主控官：反對！大人。
陳夢吉：大人，我只想證明控方指證被告嘅殺人動機，根本上就離曬大譜！
主控官：大人！辯方嘅比喻先至離曬大譜兼不切實際！
陳夢吉：實際啲吖嗱（手指向陪審團中一位醜樣嘅老女人）嗰位姑娘，如果被告想溝你，你受唔受溝？
老女人：梗系唔受啦！（表情嚴肅）
陳夢吉：畀返一千幾百過你吖，頂住半晚先都得啩？
老女人：有冇搞錯呀？一千幾百咁少呀想溝我，你個死鏟！（非常生氣，手指向阿歡）
阿歡：喂，大姑！你答問題就答問題囉，你做乜鬧人死鏟得架你？你而家咩狀態呀？你個咩新絲蘿蔔皮呀？我話你知。你呀，我話你知吖，我何歡餵魚都……
老女人：你系一個窮心未盡，色心又起嘅殺人犯嚟架。抵你坐監，坐到你死都抵吖。
（兩人嗌交嗌到拫曬）
法官：靜一靜！！！！
陳夢吉：大人，殺人動機已經證明咗冇架嘞，再講……
主控官：大人！被告靚唔靚仔樣唔樣衰根本同殺人系冇關係架，況且辯方喺度……
陳夢吉：咪住！
主控官：你咪住先嗱，況且被告……
陳夢吉：聽埋我講先喇，就算真系殺人嗱，都行遠啲呀，有咩理由喺自己返工地方冧友呀？
主控官：噉你認為何春系點死咖？
陳夢吉：我點知呀？喂，大家諗諗呀，話唔定系何春垂涎被告嘅籮柚，因奸不遂反而自殺，順便嫁禍。
法官：陳夢吉！呢度系大英帝國嘅法庭，唔系你哋啲中國地踎衙門，我都唔知你做緊乜？唔識法律，唔該你返去讀多啲書，你唔為自己著想，都唔可以丟曬你哋啲中國同胞嘅架！
陳夢吉：疏利！疏利！
（返埋位細細聲同呂忍講）
陳夢吉：開口埋口大英帝國，條友唔記得咗香港借畀佢哋架啫，要還架，大佬！喺我哋個場噉嚟串我，僕佢個街！
呂忍：為咗阿歡一人少句喇！
陳夢吉：噉系吖嘛！疏利！疏利！
法官：傳召證人！
證人一：當時我喺廚房洗緊米，聽到槍聲咪走咗入後欄睇嚇。
主控官：你出去見到啲乜嘢？
證人一：見到死者何春佢中咗一槍，週身都系血，瞓咗喺地下，何歡佢重搵支槍指住佢，系噉樣笑咗三聲：哈哈哈！何春你今次重唔死？
主控官：跟住點呀？
證人一：跟住我好驚，嗌咗出嚟，然後何歡發咗癲噉樣追殺我哋！
陳夢吉：反對！證人你講緊咩呀？你喺差館落嘅口供唔系噉架喎？
主控官：我就系想問，點解你要改口供？
法官：反對無效，證人回答問題。
證人一：因為我驚何歡報復，所以當初冇講全部真相。
主控官：我冇嘢問，到你嘞。
陳夢吉：要求一號證物呈堂！（扐起一柄火槍）證人！呢支槍只能夠打一發子彈，你話聽到槍聲過後，佢重點樣追殺你呀？
證人一：佢唔系用槍追殺我。
陳夢吉：用咩呀？
證人一：圓月彎刀！
陳夢吉：（大跳）有冇呀？（呈上圓月彎刀）真系有？
證人二：何歡追殺我，佢用嘅系血滴子，佢一路系噉追我，我好驚好驚！佢一路系噉追我。
證人三：佢用支三節棍撲我個頭，系噉撲呀撲，左又撲，右又撲……，系噉撲……
證人四：佢當時用一對鴛鴦柳月刀。
陳夢吉：呢啲所謂證物，我事前從未見過喎。
主控官：呢啲系新發現！
陳夢吉：殺一個人何須帶齊十大武器呀？
主控官：噉更加證明，何歡早有預謀，連無辜嘅市民都想殘害，攬住死一鑊熟。
何歡：你個口水精咩都你講曬，你冇好死啊！你生仔冇屎窟呀！
主控官：大人，我要求加控何歡恐嚇司法人員，藐視法庭，蓄意傷害我身體同埋喺公眾地方掟垃圾四項罪名。（俾只鞋掟中）陳夢吉！
陳夢吉：我冇掟到呀！唔系我掟咖。嗱，你冇亂嚟呀！
一觀眾：你掟咗我只鞋算點呀？快啲畀返只鞋我呀。
陳夢吉：頂住呀！頂住呀！
（呂忍掟返只鞋畀嗰個人）
（法庭休息）

中途搵線索
（陳夢吉，阿仁同埋龍二哥夜晚去到案發現場搵線索）
陳夢吉：真系圓月彎刀喎。真系血滴子喎。啊！
龍二哥：有妖氣！
（突然發現地下貓嘅排泄物）
陳夢吉：咩嚟架？
龍二哥：系貓嘅排泄物。
陳夢吉：（好詫異噉望住龍二哥食貓屎）你餓成噉樣樣？
龍二哥：可能系重要嘅線索。
陳夢吉：何以見得啊，龍二哥？
龍二哥：就憑我「龍二哥」三個字！
阿仁：呢度好多重要線索，系我踩入嚟架。（除咗只鞋畀龍二哥）
陳夢吉：嗰只鞋有冇呀？
阿仁：（脫下另一隻鞋子）好多啊！
陳夢吉：畀埋阿龍二哥喇！線索好重要咖！叫聲龍二哥添！
阿仁：龍二哥！
（龍二哥將耳仔貼喺地下）
龍二哥：噓！聽到腳步聲，越嚟越遠，越嚟越遠！
（其實系陳夢吉同阿仁走嘅腳步聲）
陳夢吉：夜嘞，龍二哥，收皮啦！
（陳夢吉、阿仁同龍二哥返到住處）
阿仁：又圓月彎刀，又血滴子，成件事一定早有預謀。
陳夢吉：今日嗰個主控官咁竄，系咩料嚟？
龍二哥：猛料！咁啱得咁巧系死者何春嘅老世叫何中。
陳夢吉：噉呢個何中有冇老世呀？
呂忍：有。咪就系佢老竇何西囉。
陳夢吉：何西？
呂忍：行政立法兩局首席議員，生意遍佈全東南亞，重有西環幾條街都屬於佢嘅何西。
陳夢吉：西？西？
阿仁：系西吖師父？
陳夢吉：一提起個西字，我就……
阿仁：好興奮咧，師父？
陳夢吉：冇錯。因為我醒起阿歡都有一個西——字嘅玉珮架。話唔定內裡有文章添呀。（轉身執起筆）呢單嘢分分鐘同阿歡嘅孤兒身世有關。呂忍，何西為人如何？
呂忍：信奉天主，正直不阿。
陳夢吉：好，阿仁，速速將呢份嘢交畀何西，務必要佢嚟法庭見見阿歡為止。
阿仁：喂，師父，為乜你畫啲鹹濕公仔呀？
陳夢吉：興奮冇？
（龍二哥等候緊差遣）
陳夢吉：龍二哥，呢鑊我靠你嘞。
龍二哥：請講。
陳夢吉：指證阿歡嗰班所謂證人一定系受到人收買同恐嚇。家嚇我以其人之道還治其人之身。拜託你出去刮返友仔用滿清十大酷刑嚟迫佢哋講出真相。
龍二哥：好橋！你點諗到架？
陳夢吉：系用我腦諗嘅。
龍二哥：放心！包喺我身上。
（龍二哥撻咗喺地下）
龍二哥：冇事！冇事！包喺我身上。放心！包喺我身上。（又跌一次）
呂忍：龍二哥認真唔掂喎。
　
打官司第二堂
（第二日，案件繼續審理）
陳夢吉：大人，我想傳召一位新證人。
主控官：咩證人咁巴閉呀？
陳夢吉：你老竇！
主控官：抗議！你敢用粗口鬧我？
法官：你唔好剩系識反對，搵次聽人講得唔得呀？
陳夢吉：傳召何西爵士。真系你老竇！
（何西出場）
何西：陳夢吉。
陳夢吉：辛苦曬你呀爵士，請！
陳夢吉：請跟我講，我謹以摯誠宣誓。爵士，你認識被告何歡嘅咩？
何西：唔識，不過佢好——好似我妾侍阿如花。
陳夢吉：咩呀？你同你妾侍有骨肉架咩？
何西：我有個仔叫做阿念西，不過佢已經死咗嘞。
陳夢吉：點樣死法？
何西：呢層唔知。
陳夢吉：點會唔知呢？
何西：噉我哋失散咗成廿年啦嘛。
陳夢吉：噉何故話佢死咗呀又？
何西：嗰日見到佢條屍體。
陳夢吉：冇見廿年，噉都認到系你嘅仔？
何西：我嚟見到條屍體嘅屁股呀。
陳夢吉：屁股？
何西：系吖。個屁股嘅右邊有個等邊三角形嘅胎記，噉條屍體咪系佢囉。
陳夢吉：爵士，所謂世事冇絕對，有陣講你都唔信。歡，唔使我教嘞嚇嘩？重唔除褲？
阿歡：哦！
何西：噉之前嗰個呢？
陳夢吉：前嗰啲齋見屁股，樣未見過。胎記嗰啲畫上去未定嘅啫。
何西：畫上去？噉佢咪系念西？
陳夢吉：今日你哋骨肉重逢，可喜可賀呀！
何西：念西！
陳夢吉：念西！念西！念西！（何西噴血）唔好咁激動！唔好咁激動！人嚟啦！照顧爵士啊！
陳夢吉：大家睇到吖嗱，何爵士親口承認被告就系佢個仔。呢鑊嘢噉樣搞法呢，極有可能系一宗陰謀奪產倫理倫常油艇仔陷害大冤案嚟架。
主控官：但系正話證人所講嘅說話冇響《聖經》面前宣誓，所以唔接納成為呈堂證供嘅。
陳夢吉：宣誓咗喇。
主控官：佢只手掂住本《聖經》，但未讀出誓詞啊！
陳夢吉：得得得！再來！（可惜，爵士死咗嘞）大人，雖然發生咗件咁不幸嘅事，但系證人臨死前所講嘅嘢——
主控官：當冇聽過。
陳夢吉：傻架你，明明講咗點當冇聽過呀？
法官：對唔住，法律就系法律，一個字都唔能夠改動。陳夢吉，我幫唔到你。
陳夢吉：喂，大人，幫到架嚇嘩？
主控官：學嘢喇陳夢吉。
陳夢吉：老竇死咗你都冇乜反應，真系要跟你學嚇嘢呀。
主控官：你重好講？一日都系你呀！我老竇有心臟病架。如果唔系你搵佢做證人架，佢唔會死，殺人兇手！對唔住，我父親啱啱過身，我控制唔到自己情緒。我唔得喇。
主控官：做咩呀？
陳夢吉：超！你詐喊？你死呀你？一滴眼淚都冇架。喂大家睇清楚啲呀嗱。干睜睜架。你重唔系有景轟吖嗱？斷正畀我呀嗱。講，做乜詐喊？
主控官：仆街啦你！
法官：控辯雙方，請你哋尊重自己身份好唔好？
陳夢吉：咪住，大家聽我講古仔先。從前有個何西爵士，乃系香港名門望族，有一長子曰何中。爵士年紀老邁，長子承繼家產乃系理所當然，點知，中途殺出一個油艇仔何歡。哼哼！有人擔心家產地位不保，把心一橫，派出其頭馬何春，將油艇仔嚟暗殺，唔知點解呀，暗殺失敗，有人即刻將計就計，將何春殺死，再將罪名嫁禍落呢個可憐嘅油艇仔身上。哇！何止心狠手辣，無法無天之尤者也。（主控官一身冷漢）唔知大家對於我呢個假設點睇呢？
主控官：（大笑）哈哈哈！！！
陳夢吉：主控官，你笑咩呀？
主控官：我笑你編呢個古仔無知兼白癡呀！
陳夢吉：咁無知兼白癡嘅嘢你都聽到標曬冷漢，都算奇特喎！
陳夢吉：（加重語氣）主控官！！案發當晚你喺邊？
主控官：喺屋企。
陳夢吉：喺屋企做咩呀？
主控官：睇書。
陳夢吉：睇咩書？
主控官：《玉蒲團》。
陳夢吉：睇到邊度？
主控官：睇到潘金蓮同阿……同阿……
陳夢吉：同阿唐三藏嚇嘩？
主控官：啊！同阿唐三藏……（突然醒起）唐三藏《西遊記》嘅，你想跣我？
陳夢吉：咦，叻仔喎！噉同阿邊個得架實在？
主控官：我做咩要答你問題呀？（情緒越嚟越激動）
陳夢吉：咪系？我都唔知你做咩要答我，攞架嚟丟。
主控官：陳夢吉你好咯喎。
陳夢吉：抹抹漢先吖。（攞出手巾）
陳夢吉：好深眼袋喎！呢排瞓得唔好定呢？何春晚晚都有嚟問候你咧？
主控官：大人！
陳夢吉：講埋先啦，嗰晚你究竟喺屋企做咩啫？
主控官：（情緒失控）我咪講咗畀你聽囉！我喺屋企睇《玉蒲團》啊！
陳夢吉：唔系講殺何春嗰晚嗱，系講緊殺佢之前嗰晚嗱。
主控官：殺佢之前一晚我去咗……（講漏嘴）
眾人：噢！——
呂忍（興奮）：Yeah!
阿歡：哼！死未？哈哈！
主控官：大人！我要求結案陳詞。
陳夢吉：結你老美！講埋你殺人之前嗰晚喺度搞咩先吖？
法管：庭警！！！！
（兩法警行去主控官面前，諗住帶佢走）
法官：唔系佢，系陳夢吉！
陳夢吉：啊！！咩料呀？（大跳一下，四個法警將陳夢吉捉住）
法官：辯方發表咗好多個人意見，都幾精彩，不過唔依法律程序……
陳夢吉：喂，唔使跟到咁足嚇嘩？
法官：你噉即系再三藐視法庭。噉，我冇辦法，我唯有依例判你監禁一天，即時執行。
陳夢吉：喂，講笑咋啩大人？畀嚇面好喎大人？唔系真架嚇嘩？
呂忍：老公！老公！
（法警將陳夢吉拉走）
陪審員張鐵生：法官大人！剛才我哋聽到嘅嘢系咪又可以當冇聽過呢？
法官：由於剛才證供唔合法律程序，各位陪審員完全絕對要當未聽過。陳夢吉由助手呂忍代表，明日結案陳詞。
手足：Court!

結案判刑
（水蓮花嚟監獄搵阿歡）
水蓮花：歡哥！
阿歡：水姑娘，點解你會喺度嘅？
水蓮花：我系嚟救你走架。
阿歡：好呀！好呀！噉我即刻攞嘢先嗱。
水姑娘：我試嚇你人格架咋。我冇睇錯，你果然系一個貪生怕死，膽小如鼠嘅懦夫。
阿歡：我系？
水姑娘：你噉樣走咗去，成世孭住單官司喺身，瞓唔安，食唔落，唔見得光。永世做一隻抬唔起頭嘅烏龜。
阿歡：我決定要留低。
水姑娘：抵惜！
（原來系阿歡發夢，攬住另一個犯人）
犯人（一巴打落阿歡度）：賤格！
獄監：何歡，有人探你啊！
阿歡：水姑娘。
水姑娘：你喺邊度剪咖？
阿歡：彌敦道九號。唔好講嘞，我系唔會走架。我唔系一個貪生怕死，膽小如鼠嘅懦夫。噉樣走咗去，孭住單官司，食唔安，瞓唔落，唔見得光。永世做一隻抬唔起頭嘅烏龜。我唔走！
水姑娘：我本身嚟系叫你撐落去，呢單官司系唔可以輸架。要保住你師父陳夢吉嘅招牌。而家我先知，你先系真真正正，赤膽忠肝嘅真英雄。我相信你系清白架。我等你！
洪十八：好！講得好啊！
阿歡：你等我？
（監禁室：呂忍、陳夢吉）
呂忍：你聽日五點先放出嚟，噉你結案陳詞點算嗱？
陳夢吉：吹我唔漲嘅，佢哋估唔到你都讀過法律，聽日就由你做結案陳詞。
呂忍：老公呀……我……
陳夢吉：阿歡條命交喺你手架嘞。
呂忍：老公啊，你送我去英國讀法律，系咪因為你對咗我七年對到悶嗱？
陳夢吉：當然唔系喇，個地球咁大，我能夠讓你出去見嚇世面始終都繫好事嚟咖，系唔系？
呂忍：老公！其實我喺英國冇讀到法律呀，佢哋唔收我。
陳夢吉：（大驚）噉你喺英國成年做咩嚟？
呂忍：我讀咗Fashion Design。
陳夢吉：咩呀？咩呀？咩「嘥」話？
（法警將呂忍趕走）
法警：夠鐘喇，阿哥。
呂忍：Fashion Design，時裝設計吖！噉點算呀老公？
陳夢吉：Fashion Design?
（繼續開庭）
手足：Court!
法官：控方，可以結案陳詞！
主控官：法律不外乎人情，但系殺人一定要填命。大家試想一下，如果受害嘅系你哋親人，你哋會點？而家所有法庭所承認嘅證據都顯示何歡就系殺死何春嘅真正兇手，我要求各位陪審員判被告何歡罪名成立。
法官：辨方！
呂忍：（走下座位，行到去陪審團面前）我老公當年送我去英國讀法律，但我好對佢唔住，我冇讀到，讀咗時裝設計，小女子才疏學淺，所以有樣嘢好唔明，究竟系法律程序緊要啲呀定系人命緊要啲呢？法官大人，如果你唔介意我講出我嘅心聲，我認為你其實讀咗咁多法律，只不過系讀屎片。我老公同我一樣未讀過法律，但系敢開天眼看凡塵，我以我老公為榮，我愛佢。各位陪審員，我相信你哋唔系傻架，你哋應該識得點樣判決，若然你哋真系傻嘅，噉我講乜嘢都冇用。Thank you very much.
（講完返埋去座位，陳夢吉就坐喺隔籬）
呂忍：（大驚）你早放咗出嚟嘞？
陳夢吉：系吖！
呂忍：你咪聽到曬？
陳夢吉：系吖！
呂忍：得唔得呀？
陳夢吉：全程剛柔並重，智勇雙全（扼住呂忍只手）老公甘拜下風！
呂忍：嗯——，你氹我嘅——（撒嬌）
陳夢吉：梗唔系喇，你睇（手指向陪審團中一個盲炳）盲嘅都俾你感動得要喊嘞。
陪審員一：大人！如果冇乜嘢，我要求休庭，因為我只眼舊患復發，流濃嘞。
（繼續開庭）
法官：陪審團！你哋有結果未？
陪審員一：有結果。
法官：結果是否一致？
陪審員一：結果一致。
法官：陪審團一致裁定，被告何歡，謀殺罪名——成立！依例判處環首之刑。退庭！！
手足：Court!
（阿歡俾押往刑場）
阿歡：等等！（跳咗幾下，一隻雞髀落咗喺地下，執起雞髀畀印度庭警）多謝你照顧咗我咁耐呀，Vamdem。呢隻雞髀請你食呀。
（刑場，準備用刑，陳夢吉等人趕到）
劊子手：Sir!
（長官點頭）
（阿仁唏噓，陳夢吉度緊橋）
阿歡：你殺死我一個何歡，重有千千萬萬個何歡！
劊子手：Sir!
阿仁（阿仁走嚟脅持長官）：唔好逼我啊！捻死佢啊！
陳夢吉：咪住，大人，請問何歡判嘅系咩刑？
法官：依例判處環首之刑。
陳夢吉：噉得嘞，阿仁！放返佢落嚟！
（主控官撲埋嚟）
主控官：你又點呀？
陳夢吉：佢判嘅系環首「之」刑，並唔系環首「死」刑，家嚇「首」已經環咗嘞，重唔放人等幾時呀？
主控官：你捉字虱！
陳夢吉：大人！法律就系法律，一字一符號皆不能改動嘅，呢鑊我都幫你唔到呀。
主控官：大人！
法官：哎！……
陳夢吉：嗱，你諗清楚至好講呀！唔系丟曬你大英帝國嘅架不得止，我再告你謀殺咖。
法官：我諗都要開嚇會先嗱！
陳夢吉：好！做嘢。
（主控官衝到刑場，緊急情況之下，一個印度人救咗阿歡）
主控官：一個二個黐線架。（阿歡俾吊起，阿仁越幫越忙。阿歡死得重快啲）
龍二哥：系時候我出手嘞。（龍二哥都唔好得去邊，把刀插中阿歡手臂）
（法庭內）法官：法庭最後決議，刑罰已經執行，何歡可以重獲自由。（一片歡呼）
阿歡：好啊！……（兩法警走去主控官面前）法警：何中！而家要拘捕你，告你意圖謀殺。
（阿歡走去水蓮花面前）
水蓮花：歡哥！
阿歡：蓮妹！（唱歌）心肝寶貝，你突然再眼前，我急促氣喘，動情為你……

尾聲
（一年後）
攝影師：慢慢嚟啊喂，睇緊位。準備好嘞喂！得未呀？
呂忍：一世人影一次婚紗相喎，梗系要精雕細琢啲啦呵老公？陳夢吉：講到精雕細琢你睇我就知嘞。
呂忍：系吖，系吖。
陳夢吉：再琢細啲添啦。
呂忍：好呀！好呀！
一女徒：師父！歡哥嚟咗喇。
阿歡：師父！師奶！
陳夢吉：歡哥！
阿歡：吉哥！
呂忍：阿水姑娘呢？
阿歡：我送咗佢去英國讀書呀。
陳夢吉：讀咩書呀？
阿歡：讀嗰啲英國文學。
陳夢吉：哦！即系「莎士髀罅」嗰啲呀？
阿歡：啊！師父果然好嘢，髀罅你都識。
陳夢吉：髀罅啱佢讀。
阿歡：好嘢！英國啲髀罅。
陳夢吉：髀罅你問我吖。
（影相）
陳夢吉：歡哥！
阿歡：師父！
陳夢吉：見你今日嘅髮型能夠襯返曬個面型。成個人鬼火咁靚噉樣，我都覺得好安慰。
阿歡：嗨，師父，今日見你再成家立室，影個靚相，著得咁靚，我重安慰。
陳夢吉：咦，噉講就你安慰啲喎。
阿歡：冇，你安慰啲。
陳夢吉：你安慰啲。
阿歡：哎！你安慰啲。
陳夢吉：畀嚇面嗱。
阿歡：唔好同我爭。唔好同我爭。你安慰啲。
攝影師：嚟得喇！望住鏡頭。大家集中精神望住，嚟得。
阿歡：彌敦道九號？
陳夢吉：啊！衰仔原來咁靚仔喎。
阿歡：靚仔大曬咩？
攝影師：唔怕話你知，靚仔真系大曬嘅。吹咩？

（劇終）