周星馳-食神 (粵語劇本)

（廟街）
相士：先生，你額有朝天骨，眼中有靈光，仙人托世，神仙下凡，終於畀我等到你。
（史提芬周欲走）
相士：咪喐，雖然我洩露天機，災劫難免，但系我命中注定，就算我冒再大嘅危險，我都要同你睇個全相嘅。
（史提芬周仍然不理）
相士：先生！先生！先生！先生！
（史提芬周幫襯火雞嘅面檔）
史提芬周：唔該畀碗嗱喳面呀。
史提芬周：鹼水面冇過冷河，所以成碗湯有鹼水味。魚蛋亦都冇魚味，但系你為咗掩飾，專登加啲咖喱汁將佢做成咖喱魚蛋，但系噉做太天真嘞，因為你煮嘅時間唔夠，咖喱味根本只系喺表面，而冇入到裡便，掂到湯之後重要沖走埋。好好哋一粒咖喱魚蛋，畀你整到冇魚味亦都冇咖喱味，失敗！蘿蔔冇揀過啦，太多渣，失敗！豬皮又煮得太腍，冇咬口呀，失敗！啲豬紅松泡泡，一夾就散，失敗中嘅失敗！最慘系啲大腸，裡面都未通乾淨，重有嚿屎，你有冇搞錯呀？（火雞唔理佢）
史提芬周：喂！屎呀喂！（火雞唔理佢）
史提芬周：喂！屎呀喂！（嗌多次）
史提芬周：喂！屎呀喂！（嗌得重大聲）
火雞：攞去抆咗佢吖！（遞廁紙畀史提芬周）
史提芬周：唔好咁幽默好喎！我四圍唱你有屎架喎！
火雞：唱乜鬼嘢呀！話明嗱喳面有兩嚿屎有幾咁奇呀？廿三文呀！
史提芬周：你畀我呀？
火雞：噓！
史提芬周：噓！講咗咁耐嘢畀返卅文嚟睇醫生啦！
火雞：噓！
史提芬周：畀嚇面啦！話曬都食神呀！
火雞：食神？
史提芬周：食神！
（兩人對望良久）
（另一邊廂）
相士：你額有朝天骨，眼中有靈光，仙人托世，神仙下凡，終於畀我等到你嘞。
神仙：我神仙喺呢區都起曬朵架啦！使咩你講呀？死婆！
相士：喂！搵食啫，唔使咁hurt我呀嘩？
神仙：死婆！
相士：死佬！
神仙：死婆！
相士：死佬！
……
（全港至尊名廚大賽）
司儀：全港至尊名廚大賽，現在開始！
（眾參賽者向史提芬周鞠躬）
司儀：有請我哋今晚嘅評判——食神！！
（啲記者爭相影相）
司儀：食神首先要品評嘅，就系大龍鳳酒樓嘅總廚，戴龍師傅嘅「皇帝炒飯」。
史提芬周（食咗一啖）：好！居然將啲米釀喺箕圍蝦裡便嚟蒸熟，再用原只吉品鮑魚搾汁，加上極品官燕嚟炒，表面上睇起上嚟平平無奇嘅炒飯，其實金雕玉砌，高深莫測。不愧有炒王嘅稱號。
戴龍：哈…哈…哈…
史提芬周：可惜，水分太多，飯粒太軟影響口感，因為你連炒飯最基本嘅常識都忽略咗。要用隔夜飯炒呀炒王！零分！
戴龍：啊！
司儀：跟住要試食嘅就系錦江飯店大廚劉三師傅嘅「錦繡多味魚」！
史提芬周：嘩！居然用蘇眉頭、星斑背、三刀腩、lap9魚身、奀哥尾嚟重新砌成一條魚，重要一邊蒸一邊炸，每種魚兩種食法，總共十種唔同味道，條魚真系……真系受咗輻射噉喎！睇見就想嘔喇，你重話叫我食？！零分！返屋企自己檢討嚇！
劉三：我……
史提芬周：你咪就系多嚿魚囉你！
廚師甲：唔系多嚿魚，你系多咗幾嚿魚呀！你呀！你呀！你多咗幾嚿魚呀！
司儀：即刻要試食嘅就系御善坊陳東師傅嘅素菜「金縷佛衣」！
史提芬周：咦！呢味齋菜，材料變化豐富，刀工細膩，造型突出，連最難雕嘅豆腐都畀你雕到十分精細喎！雕咗幾耐呀？
陳東：雕咗成日架啦！
史提芬周：噉咪得個雕字！臭曬啦！你聞到嗎？
陳東：聞到。不過，主要呢個菜式呢，顯示我快刀手嘅刀工啫！
史提芬周：唔該伸出你嘅左手。突出你嘅中指。（陳東嘅中指粘咗膠布）
史提芬周：快刀手，就切損手，好嘢！（畀陳東零分）
司儀：而家只系剩得五羊酒家大廚楊震天嗰味「乾坤燒鵝」啫，睇嚟今次要攞冠軍佢好穩陣啦！
史提芬周（用手掂燒鵝）：凍曬嘞！零分！收工！
楊震天：咪住！叫得「乾坤燒鵝」，當然內有乾坤喇。其實，我系食裡便啲禾花雀咋！啲禾花雀吸收燒鵝嘅香味，而且保溫，喺呢個時間食，啱啱好呀！每一個細節，我都計算埋架！食神，你無話可說啩！
司儀：精彩呀！今屆嘅至尊名廚終於誕生嘞！
史提芬周：咪住！都系零分！
楊震天：嚇！
司儀：喂！唔系呀嘩？
楊震天：點解呀？
史提芬周：因為太醜樣嘞。
楊震天：冇可能嘅，我啲禾花雀系百中選一，無論身材、樣貌都系一等一喎！
史提芬周：我並唔系指啲雀，系指閣下！
*楊震天：我醜樣！（問旁人）喂！醜樣關餸咩事呀？
史提芬周：關事，試問見到閣下個樣，重邊有胃口食。所以我都唔敢望你。
楊震天：醜樣冇罪架！
史提芬周：有罪，作為一個廚師，應該考慮到食客最細微嘅心理，等於三級片嘅女星，都要去隆胸嚟取悅觀眾，你有啲潛質嘅，不過整咗容先講！
楊震天：呀！（雙手掩面痛哭）
記者：擘開佢只手啦！
司儀：估唔到食神對菜式嘅要求系咁嚴格架！究竟點先可以煮到個無懈可擊嘅餸出嚟呢？
史提芬周：其實煮食之道，最緊要系一個字——（劃咗個「心」字出嚟）
史提芬周：呢味「彩虹鮮花拔絲」，系我送畀大家嘅甜品。
司儀：嚇！繫個心字？！
史提芬周：冇錯，只有用心，先可以做到最好嘅菜！
楊震天：（食咗一啖）好好味呀！

司儀：佢高傲，但系宅心人厚；佢低調，但系受萬人景仰；佢可以將神賜畀人類嘅火運用得出神入化，可以煮出堪稱火之藝術嘅超級菜式！佢究竟系神仙嘅化身，定系地獄嚟嘅使者呢？冇人知，但系可以肯定，每一個人都畀佢一個稱號──食神！（畀史提芬周摑咗一巴）
史提芬周：你就噉神仙嘅化身咪得囉！你講乜嘢地獄嘅使者呀！地獄關我咩事呀？
司儀：我諗住加少少神秘感畀你咋嘛！
史提芬周：你諗住？噉幾時輪到我諗呀喂？神秘感！神你老母！黑曬畫面一眼spotlight打落嚟打到你條粉腸成隻鬼噉呀，你重嫌唔夠神秘感？我而家唔系拍恐怖片呀大佬！
司儀：導演叫架！
史提芬周：嗰個導演你同我搵人買起佢，跟住你再同我搵人買起你。有啲噉嘅廢柴導演呀！要有你啲噉嘅廢柴司儀大家配合埋一齊先嚟sin3到我咋嘛！你而家系咪玩我吖？
司儀：對唔住呀！我保證下次執好啲稿佢吖！我而家去改一改佢。
史提芬周：廢柴！你條廢柴！你記住呀你系一碌廢柴，你唔好行返去，你碌返去好呀你。
史提芬周（走去另一邊）：各位師傅，辛苦曬！
各師傅（拍手）：應該嘅！應該嘅！
（史提芬周同各師傅逐一扼手）
戴龍：心照啦食神！
史提芬周：唔好噉講！唔好噉講！
史提芬周（同劉三扼手）：劉師傅，多謝曬！跟你學嘢。跟你學嘢。
劉三：應該嘅！
史提芬周：多幾嚿魚呀你！
劉三：練咗好耐架喇。……
*陳東：有咩需要幫手開聲呀你。
史提芬周：一定！一定！
楊震天：多謝你封大利市就真！
史提芬周：你知道收咗我大利市嘅咩？你知收到我錢架嚇嘩？噉你唔好成場鬼殺咁嘈啦！
楊震天：我好投入好大聲嚟講架喇！
史提芬周：唔系大聲就好戲架楊師傅！你尤其是最lau1尾嗰句「好好味呀」嗰句呀，你嗌到幾硬幾假呀！盲嘅都知道你做緊戲啦！你有冇職業道德架你呀？
楊震天：當時含住你整嘅水晶膠加雙氧水……
史提芬周：噉梗系水晶膠加雙氧水啦！唔系我撩到個字出嚟！你一早知架嘛呢啲嘢！
楊震天：好難頂吖嘛！
史提芬周：噉梗系難頂啦！而家就系要你難頂咋嘛！你重喺度駁嘴，你以為真系有料呀？有料你企喺度插我唔系我企喺度插你啦！你啲噉嘅死蠢！你畀著我兩年前唔好老脾，我一腳踭你落下便花園道呀，再掛喺皇后像廣場嗰度嚟鞭屍呀！你啲噉嘅……（揦起一堆煙頭塞落楊震天口中）即刻同我含住啲煙頭企喺角落頭呀，嗌「好好味呀」，嗌到我滿意為止呀！
史提芬周：阻唔阻你哋呀？
其他幾位師傅：我哋走先喇。
史提芬周：喂！好呀！好呀！好呀！唔該！唔該！唔該！多謝！
（史提芬周電話響，又走去另一邊）
（財團老闆拋一根煙畀史提芬周。）
史提芬周：喂！你只大快樂升咗幾個價位架喎！你唔通知我嘅？
財團老闆：系咩？我唔知喎！我自己都唔知！我發誓自己都唔知！傾返生意先，我有嚿嘢，諗住借助你嘅大名睇嚇大家有冇得合作嚇。
Richard：即食碗麵。
史提芬周：Maggie。
Maggie：而家市面上流行嘅「即食麵」呢系有五十三種。一年嘅營業額系有十三億，即食碗麵佔其中嘅三十三個percent，競爭都好大。
史提芬周：包裝唔錯呀！
財團老闆：個細侄負責搞嘅，佢好崇拜你架！Richard，叫史提芬哥啦！
Richard：史提芬哥。
史提芬周：咦！Richard，好Richard喎！受過高等教育定嘞！
Richard：系呀！美…美…美國哈佛大學。
史提芬周：美…美…美國哈佛大學。（眾人笑）
Richard：重有英國劍…劍…劍橋大學。
史提芬周：劍…劍…劍橋大學。（眾人大笑）
Richard：雙碩士學位。
（史提芬周拍手大笑）
Richard：或者等我講嚇呢個產品嘅設計吖！（走向史提芬周）
史提芬周：你做咩呀？你行過嚟做咩呀？你喺嗰便講你咪講囉！呢度系你行埋嚟嘅咩？你邊度鄉下呀？
Richard：潮州。
史提芬周：（潮州話）pu你阿母！你曉唔曉規距嘅啫？唉！你真系，重話碩士學位，食屎學位咋啩！
財團老闆：你行過去做咩啫？人地叫你喫屎呀！聽唔聽到呀你呀？
史提芬周：喂！算啦，唔好嚇親啲細侄啦！
財團老闆：噉系吖嘛！呢個細侄我唔教，邊個教佢啫。
史提芬周：定啲嚟呀你，唔好手震呀！嚟！乖啦！奀姑！奀姑！笑返。（Richard笑返）呀！！
史提芬周：喂！你呢碗嘢呢，我睇啲魚蛋曳啲喎！松泡泡冇彈力嘅！
財團老闆：愛嚟食啫！要咁彈做咩呀？打兵乓波呀？哈…哈…哈…
史提芬周：邊個話……唔可以……打兵乓波啫？（魚蛋打中財團老闆塊面三次）原來都幾彈喎！
（財團老闆企起身，睥住史提芬周）
史提芬周：飲杯先啦衰鬼！
財團老闆：衰鬼！喂！呢劑嘢你幾時有興趣幾時搵我！赴湯蹈火。
史提芬周：上刀山落油鑊。
二人：好兄弟！
史提芬周：真繫好兄弟呀！
財團老闆：睇住我呀大佬！
史提芬周：靠你啦大佬！合巹交杯！
（大廈內）
財團老闆：喂！有批牛肉好抵架，有需要咪打呢個電話囉。（畀卡片史提芬周）
史提芬周：鮑魚唔見你益嚇我。
唐牛：借借唔該！（阻喺史提芬周面前）阻大家一陣呀！我叫做唐牛，我系中國廚藝學院一百零五屆畢業生，我煮嘢好好食架。
史提芬周：啱啦！煮嘢好食咪終須乞食囉！餵你請埋曬啲傻仔唔掂架喎！
財團老闆：我唔識佢架大佬，唔系你啲人嚟咩？
史提芬周：阿肥牛，你邊個部門架？
唐牛：唔關事嘅，我行過架咋！
史提芬周：嚇！
唐牛（跪地）：其實我繫好仰慕食神你，所以想睇嚇食神你有冇可能畀個機會我，或者……畀我跟住你執頭執尾呀！
史提芬周：僕你個街呀！
財團老闆：SECU！
史提芬周：做咩啫？
財團老闆：鎖佢囉！
史提芬周：我有話鎖佢咩？
史提芬周：你好想跟我咩？
唐牛：系呀！你叫我做乜都得架！
史提芬周：即刻喺電梯口屙涿屎嚟睇嚇先講啦！
（唐牛喺電梯口踎低除褲，口擔廁紙）
史提芬周：得嘞！呢條肥仔幾掂喎！哈哈！聽日九點鐘，上四十一樓搵Amy啦！
財團老闆：喂！唔系吖嘛！
史提芬周：咩呀？我鍾意呀！
財團老闆：鍾意點就點！嗱！呢啲就Power呀喇！
唐牛：多謝！多謝曬！（財團老闆眼神詭異）

（另一日）
職員甲：哎呀！（籮柚插住一支叉）
眾人：做乜事呀？做乜事呀？
職員甲：老世今晚留喺度食飯，我攞錯咗支紅酒上去，而家佢發曬脾氣呀！
職員乙：你攞錯咗邊支上去啫？
職員甲：佢要八二囉。
唐牛：我呢支咪八二囉！
職員甲：我攞錯咗支八三吖嘛！
職員乙：噉重唔嗱嗱聲攞上去？
唐牛：系咯！系咯！系咯！
眾人：你去啦！
（天台）
唐牛：周生，你支八二年呀！（唔小心kik7倒，支酒跌碎）
史提芬周（用毛巾替唐牛抹咗啲鼻血）：肚唔肚餓呀？坐低食嘢啦！
唐牛：點解會噉嘅？
史提芬周：我其實繫個好人嚟架。我都有同情心架。你哋估我唔到架嘞。快啲食嘢啦。
唐牛（耷低頭諗住食嘢，畀史提芬週一手撳落喺蛋糕上面）：點解又會噉嘅？
史提芬周：兜口兜面同你講咗架喇。你估我唔到架嘛。快啲食嘢啦。
唐牛：嚇？一次咪夠囉，重想整多次？！
史提芬周：嘩！畀你估到我想嚟多次我重有面嘅？！噉重得了嘅？！
唐牛：系喎，我真系戇居呀！
（耷低頭諗住食嘢，又畀史提芬週一手撳落喺蛋糕上面）
唐牛：我真系估你唔到呀！
史提芬周：兜口兜面講咗兩勻架啦！畀你班蛋散估到我就唔系食神啦！
唐牛：食神好嘢！
史提芬周：使乜講呀！掂呀！
唐牛：食神好嘢！
（唐朝分店開張日）
史提芬周（向手下交帶啲嘢）：張台有咁窄得咁窄，張凳有咁迫得咁迫咪等啲友坐得咁舒服，食完嗱嗱聲好走。飲管有咁粗得咁粗，冰有咁大嚿放咁大嚿，杯汽水咪雀一聲飲完買過第二杯囉。你系咪新嚟架？呢啲嘢要我教，你唔好一味得個岌，做啦仆街！
女職員：周生，可以剪綵咯喎！
史提芬周：好！嚟！準備好未？準備好未？預備！（剪完彩）好！
鬼佬：Congratulation！
史提芬周：Thank You！入去食啲嘢！
財團老闆：喂！你間分店又開正喺我大快樂對面，認真唔話得喇！
史提芬周：FRIEN唔FRIEN呀？
財團老闆：衰鬼！
阿水：周生，恭喜！恭喜！
史提芬周：多謝！多謝！
阿水：飲多啲呀。飲多啲呀。
唐牛：陣間一嚟呢就有FANS同你獻花，跟住你上台呢……
史提芬周：邊個識得請啲FANS返嚟獻花咁有計呀？
唐牛：唔系請架！真系你FANS呀！
史提芬周：啊？
唐牛：女學生，斯斯文文，等你好耐架嘞！
（史提芬周諗返起自己嘅中學時代）
史提芬周（喺塊鏡前反覆練習）：乜咁啱嘅？……
漂亮女生：Hi，乜咁啱嘅？拜拜！（史提芬周攬住唐牛，個樣冧曬）
唐牛：周生，周生。獻花呀！
史提芬周：系呀！我知呀！
唐牛：嚟得未呀？
史提芬周：等你咋嘛！
（一核突女生撩緊鼻屎，撲埋嚟）
女學生：食神！
史提芬周：咦！有飛蝶喎！（引開眾人視線，一腳將女學生踢開）
史提芬周：各位！我哋今日慶祝唐朝第五十間分店開張典禮即刻就開始嘞。
唐牛：時辰亦都擇啱曬，可以請阿灶君入廚房嘞！
史提芬周：但系我哋趁住重有些少時間呢，想同大家介紹一下唐朝新推出嘅「刻骨銘心初戀金銀情侶套餐」，孔子同耶穌都講過，「初戀無限美」，所以我哋揀咗呢個題材。加上高貴嘅用料，每個套餐只系賣九十九個九毫九，一嚿水都唔使呀陰功！隨餐重要附送印花一個，集齊印花五個，再加九十九個九毫九就可以換到呢個刻骨銘心嘅骨頭鏈嘴，呢個鏈嘴因為經我食神開光，所以對於青年男女談戀愛有妙不可言嘅功效嘅。
唐牛：加埋印度神油重如虎添翼添呀！
史提芬周：哈哈哈哈哈！
唐牛：不如請阿食神為大家示範嚇點整個套餐呀！
史提芬周：獻嚇丑就少不免架嘞！但系整得唔好大家唔好hoe1好呀！
唐牛：哎！整得唔好你就唔系食神喇！好嘢！好嘢！好嘢！
史提芬周：首先我哋要重金禮聘一啤熱戀中嘅豬，睺佢哋唔為意將佢哋放血。再用佢哋嘅血……
唐牛：即系豬紅吖。
史提芬周：哎！系濃情化不開嘅豬紅。做咩呀？見到啲同類嘅血，有多少難過呀？哈哈哈！
史提芬周：然之後我再將佢哋嘅皮炸成金黃色。
唐牛：即系豬皮吖！
史提芬周：系情比金堅嘅炸豬皮！
唐牛：即系豬皮囉！（眼中閃出殺氣）
史提芬周：再將一生只戀愛一次嘅「巴黎九棍魚」起肉打成魚蛋，再放喺印度嘅感情咖喱上便。
唐牛：咖喱魚蛋？豬紅、豬皮、魚蛋，有冇蘿蔔添呀？
史提芬周：嗨！呢啲人多事呀！呢度唔使你，出去幫手招呼人客！系！其實梗系唔少得代表天長地久嘅韓國野生蘿蔔，同埋一條蕩氣迴腸嘅豬大腸，再鋪喺蔫韌纏綿嘅生面上便。
唐牛：就一家團聚成為一碗街邊嘅嗱喳面。
史提芬周：哎！哎！哎！哎！
唐牛：呢碗嘢賣九十九個九毫九過唔過分呀？
史提芬周：哎！哎！哎！哎！
唐牛：不過！一碗嗱喳面能夠整到好食都唔容易喎！因為越簡單嘅嘢越難整吖嘛！
*史提芬周：呀！所以個意義咪止唔系就系噉囉！
唐牛：好！就等我試嚇你碗嗱喳面呢！
唐牛：咖喱魚蛋冇魚味，咖喱又唔入味，失敗！豬皮煮得太腍，冇咬口，失敗！豬紅松泡泡，一夾就散，失敗！蘿蔔揀都冇揀過一口都系渣，失敗中嘅失敗！最離譜系嚿大腸，完全冇通乾淨，重有嚿屎，你有冇搞錯
呀？
史提芬周：戙篤笑咩家下叫你做？叻喇！返咗去後台補妝先啦！
唐牛：你噉樣做生意？你有冇良心呀？
史提芬周：SECU！SECU！（唔見啲保安行動）
唐牛：呢嚿骨頭呀！我每晚有份喺垃圾筒度執架！你夠膽賣成嚿水，你噉樣呃啲顧客我實在睇唔過眼呀！我唔會再幫你做啲噉嘅嘢架！你呢啲咩食神呀？除咗呃人重識唔識煮嘢呀？重識唔識楂鑊吖？重識唔識楂刀呀？
史提芬周：你頂住，我走先！
保安：人哋問緊你嘢，你答咗人先走得架！
史提芬周：咩話？啊？好嘢！
唐牛：你根本就冇資格叫食神！
史提芬周：我唔會喺度同你撐架！你慳啲呀！
唐牛：你連喺街邊賣嗱喳面都冇資格呀！
*史提芬周：對唔住！你已經唔系本集團嘅人。你再喺度發噏瘋我叫警察！你冇資格企喺我面前講嘢，我先系食神！你連同我挽鞋都未夠班呀，契弟！你想玩我？！我唔怕瘀架！嚟呀！嚟呀！我買起你全家都重得呀！
唐牛：你恐嚇我冇用架！
史提芬周：有人喺度搗亂！唔准影！
唐牛：夠膽揦起把菜刀證明畀大家睇你重識煮嘢吖笨！
史提芬周：我唔識？（拿起刀，畀唐牛一羹打飛）
唐牛：身為一個廚師，你連楂刀嘅基本腕力都冇。嘩！（爆衫，一身廚師打扮）
（史提芬周呆曬）
唐牛：等我唐牛嚟話你聽，點樣整一碗靚嘅嗱喳面。
（唐牛整嗱喳面）
唐牛（搞掂）：煮嗱喳面都要心思架，一字記之曰「心」！我先系真正嘅食神！
（史提芬周回憶舊事）
唐牛：我真系估你唔到呀。我系中國廚藝學院一百零五屆畢業生。我煮嘢好好食架。
史提芬周：煮嘢好食咪終須乞食。煮嘢好食咪終須乞食。
唐牛：食神好嘢！
（史提芬周唔小心打爛咗灶君，咁啱呢個時候衛生署職員入咗嚟。）
衛生幫（出示拘捕令）：阿周生，有五十幾個客人喺你餐廳食咗牛扒餐，感到不適，我哋懷疑你用咗英國嘅走私牛肉，而家請你即刻跟我哋返去協助調查。
（史提芬周諗返起財團老闆之前介紹一啲牛肉畀自己）
財團老闆：喂！有批牛肉好抵架，有需要打呢個電話吖。好抵架，有需要打呢個電話吖。
（史提芬周畀搭上孖葉，拉去協助調查。）
（史提芬周見到原來財團老闆同唐牛系夾埋嘅。）
（史提芬周上曬報紙頭條）
（唐牛做咗食神，史提芬周正式破產。）
唐牛：啲凳有咁窄得咁窄，啲飲管有咁粗得咁粗，啲冰有咁大粒得咁大粒，啲薯條有咁熱氣得咁熱氣，等啲僆仔食完之後有咁口渴得咁口渴，呢啲嘢你應該知唔使我講架啦！
廚師：噉樣對啲小朋友嘅健康好似唔系幾好喎！
唐牛：以前史提芬周除咗插你哋之外有冇開拖打你哋架？
廚師：冇。
唐牛：吆！吆！吆！吆！（將廚師打倒在地）嬲得我吖！唔好迫我吖嘛！我好人嚟架嘛！拉佢出去吖！
（史提芬周 欠下巨債 無法償還 宣佈破產）
（史提芬周 身敗名裂 行蹤成迷）

（廟街）
史提芬周：蘿蔔冇揀過啦，太多渣，失敗！豬皮又煮得太腍，冇咬口呀，失敗！啲豬紅松泡泡，一夾就散，失敗中嘅失敗！最慘系啲大腸，裡面都未通乾淨，重有嚿屎，你有冇搞錯呀？
火雞：唔奇吖。話明嗱喳面有兩嚿屎有幾咁奇呀？廿三文呀！
史提芬周：你畀我呀？
火雞：噓！
史提芬周：噓！講咗咁耐嘢畀返卅文嚟睇醫生啦！
火雞：噓！
史提芬周：畀嚇面啦！話曬都食神啦！
火雞：食神？
*史提芬周：食神！唔系講笑架，真系！喂！幫幫手啦！做兄弟，一個幾毫都好呀！封返多少吖，真系。拍硬檔吖！
(兩個人走出嚟將史提芬周拳打腳踢）
火雞：算啦！算啦！
兩人：唔好阻住做生意吖嘛！
火雞：得啦！點呀你？
史提芬周：冇事！冇事！冇事！咦！見曬紅添呀真系！嘩！呢鑊真系要睇醫生喎！畀返多少好喎！
瘦骨仙：玩嘢嚇嘩？
史提芬周：冇嘢！冇嘢！唔好意思，大佬！
瘦骨仙：你玩嘢我同你玩呀！
史提芬周：唔系！唔系！大家好兄弟好唔好呀？好兄弟，我食神呀，畀嚇面吖大家。對唔住，對唔住，唔好意思，唔好意思，真系，真系。
（史提芬周畀人當街毒打，火雞出嚟勸開眾人）
眾人：打死佢！
瘦骨仙：夠膽喺度搵食！斬佢只手落嚟！打佢老母！
（火雞將史提芬周拖入後巷）
肥雪：咦！咩料呀？畀我舂返槌先啦！唔該吖！
火雞：走！走！走！走！
（史提芬週一路瞓喺後巷，夜深人靜嘅時候火雞走去睇佢。）
火雞：肚唔肚餓呀？
史提芬周：麻麻哋吖！
火雞：食唔食嘢呀？
史提芬周：是但啦！
（火雞遞碗叉蛋飯史提芬周食）
史提芬周：碗飯……好好食！
（將碗飯食到見曬底，一粒米都冇剩，突然聽到嘈雜聲，出面兩幫人準備講數）
神仙：喂！重唔幫拖！（拉咗史提芬周出去，兩幫人對峙，鵝頭同火雞坐喺中央）
*火雞：鵝頭！我繫個女人仔嚟啫！你要蝦我就蝦啦！不過當年昆叔嘅頭馬飲大咗兜頭劈我一刀，畀我揦住兩把嘢由西貢街斬到佢落公眾四方街，有邊個唔識我「雙刀火雞」呀？阿姐十二歲出嚟廟街碌，乜嘢風浪未見過呀？你睇嚇你帶啲噉嘅二打六嚟踩我場！你嚇鬼呀？
鵝頭：火雞，你講咩呀？我要踩你個場呢，肯定唔止咁少人！我嚟系話聲畀你聽，以後「攋尿蝦」就跟我！
火雞：你話跟就跟呀！你估你天王老祖呀？「牛丸」單嘢都未同你計呀！
鵝頭：噉講法，食屎都得嘞！總之牛丸呢，就各有各做，攋尿蝦我包嚟做！
火雞：噉唔使講規矩啦！
鵝頭：我依家就系同你講規矩，總之四四六六傾掂佢！
火雞：就同你四四六六，你哋四我哋六！
鵝頭：唔系吖嘛！我撞聾呀！不如九一，我九你一！（兩幫人各自起哄）
瘦骨仙：唔好喐呀！劈你哋架！
神仙：唔好喐呀！
鵝頭：我畀曬啲攋尿蝦你又點啫！你識整咩？
火雞：我哋唔識你哋識咩？
鵝頭：我哋堅記嘅椒鹽攋尿蝦，不留都賣到出曬位嘅！重有吖，辣椒同淮鹽比例啱啱好，鑊油晚晚都換嘅，奉旨冇油膉味呀！火爐呀十足，連啲蝦殼都炸到卜卜脆架！
史提芬周：噉搞法，就冇咗攋尿蝦嘅鮮味嘞！
鵝頭：邊個喺度阿吱阿咗呀？
火雞：總之我哋「白焯攋尿蝦」鮮味十足。
鵝頭：白焯！去整返你啲一坺屎嘅牛丸喇！
火雞：你啲牛丸做唔掂，想擸埋我啲攋尿蝦咋啩？
鵝頭：牛丸你唔做我哋做埋！畀張好牌你，你都唔識上！
史提芬周：爭咩呀？兩樣溝埋變做攋尿牛丸吖，笨！
鵝頭：邊個？邊個又搭嗲？阿大喺度講緊嘢邊個夠膽插嘴！
（史提芬周做出手勢叫神仙唔好出聲）
火雞：唔好迫我啲僆，系你啲僆講唔得呀？
鵝頭：我啲靚咁有家教，肯定唔系佢哋講！
火雞：系咩？
（鏡頭一轉，兩班人馬一字排開。）
鵝頭：逐個講：「爭咩呀？溝埋嚟做攋尿牛丸吖，笨！」
火雞：有講個笨字咩？
鵝頭：肯定有呀，我出名順風耳呀！
二人：你講先！
手下甲：爭咩呀！溝埋嚟做……流利牛丸吖笨！
鵝頭：唔系！你！
手下乙：爭咩呀！溝埋一齊做牛丸……攋尿吖笨！
鵝頭：你！
*手下丙：我使唔使ngan3嚇ngan3嚇先講呀？
鵝頭：隨你！
手下丙：溝咩呀？哎！Sorry！
鵝頭：講過啦！繼續啦！
手下丙：爭咩呀？溝佢嚟做攋尿牛丸吖！笨！
鵝頭：你！
手下丁：（閩南話）別吵了！做尿尿牛肉丸就行了！笨！
鵝頭：你講咩春呀？
手下丁：（閩南話）閩南話囉！
鵝頭：閩南話？！你返去食屎喇！
（鵝頭繼續聽其它人講，肥雪喺度自己練習。）
鵝頭：你！
肥雪：爭咩呀？溝埋一齊做攋尿蝦啦笨！
鵝頭：你！（神仙忍不住笑）笑咩呀？講呀！
神仙：爭咩呀？溝埋一齊嚟做攋尿牛丸啦笨！（一路笑一路講）
鵝頭：你！
史提芬周：爭……笨！（含糊其詞）
鵝頭：你！（史提芬周見成功過關，得意洋洋）
瘦骨仙：爭咩呀？溝埋一齊嚟做...
鵝頭：咪住！你再講多次！（指住史提芬周）你呀！
史提芬周：爭……笨！（含糊其詞）
鵝頭：再清楚啲講多次！
史提芬周：……笨！（含糊其詞）
鵝頭：冚家鏟！重唔系你？
史提芬周：喂！我咁求祈你都認得出？
鵝頭：嚇！你把聲咁jap9，化咗灰都認得啦！火雞，你嘅人呀！點睇呀？
（史提芬周畀人撳住喺檯面。）
*鵝頭：架撐！你個爛癱，成晚窒頭窒尾，冇大冇細，想唔愛手指尾定手指公呀？
史提芬周：手指甲啦！
鵝頭：嚇！（一刀劈嚇，火雞徒手接住）
火雞：喺我環頭邊個夠膽喐佢！
鵝頭：噉你即系算點呀？
火雞：佢系我嘅人，我唔攬佢我重可以出嚟行嘅！（一手將鵝頭把刀擗開）
鵝頭：噉即系唔使講規矩啦！行開！（揦起個台磧向火雞）仆街！
（火雞用刀將台劈穿，刀鋒停喺鵝頭面上，眾人亂曬龍。）
鵝頭：定啲嚟！雞姐！我諗過架喇！總之以後攋尿蝦、牛丸，乜Q都畀曬你做，噉得嘞啩？
（火雞將刀移開，鵝頭等人好唔服氣地離開）
史提芬周：唔該曬你呀喂！
火雞：做兄弟唔使講嘢！
史提芬周：好似你咁夠義氣嘅人真系難搵！
火雞（唱）：情與義，值千金，刀山去地獄去有何憾！為知心，犧牲有何憾！為嬌娃，甘心剖寸心！好兄弟！血淚為情流，一死豈有恨，有誰人，敢過問！
（火雞同史提芬周並排坐，鵝頭帶住班人嚟尋仇，但冇幾耐三人坐埋一齊，望住一粒嘢彈嚇彈嚇。）
鵝頭：攋尿牛丸？
史提芬周：冇錯！
鵝頭：點解會噉……彈嘅？
史提芬周：因為粒牛丸中間系空嘅，原理就好似而家鞋底有氣嘅Air波鞋一樣！
鵝頭：我想整啖得唔得呀？
史提芬周：快啲吖！
鵝頭：好爽呀！
史提芬周：爽呀？
鵝頭：爽呀！
史提芬周：全靠佢咋！阿火雞姐嘅腕力驚人，只有佢先可以打出噉靚嘅牛丸，因為平均每底牛肉需要二萬六千八百幾次不停系噉舂系噉舂。
鵝頭：但系「攋尿牛丸」點「攋尿」法呀？
史提芬周：成粒啪落去睇嚇點！
（鵝頭將成粒「攋尿牛丸」擺入口中，啲水如火山爆發般噴出，鵝頭幻想自己喺沙灘上狂奔）
鵝頭：從來未試過噉清新、脫俗嘅感覺，牛肉嘅鮮、攋尿蝦嘅甜，溝埋一齊嘅味道，居然比老鼠斑有過之而無不及，甚至比我嘅初戀更加詩情畫意，所謂「舉頭望明月，低頭思故鄉」，好詩！好詩！
嘍囉：喂！大佬，冇嘢呀你？
鵝頭：行開，呢粒嘢掂呀！
史提芬周：名我都改埋呀，「爆漿攋尿牛丸」！呢劑我睇發達都似呀！
*鵝頭：講呀！你當我kai1架！咁易發達，我夠會講啦！
火雞：我信佢！應該點做？
史提芬周：梗系開間鋪頭做旺佢搵咗第一陣錢先啦！
火雞：嘩！噉我咪可以換過部最新嘅卡啦OK！
鵝頭：火雞，講出嚟都畀人笑啦！梗系買層樓收租吖嘛！噉先至系最高章！
史提芬周：梗系啦！不過如果畀我呢，開分店，一間變兩間，兩間變四間，四間變八間，八間之後上市，上市咪再集資囉！跟住炒股票囉！搞埋地產呀笨！跟住，再分拆上市，到時淨系收股息我都唔知點計呀！哈哈
哈！
鵝頭：哈！
火雞：嚇！你笑呀？你明呀？
鵝頭：明就唔繫好明嘞，不過聽落就好有計呀！
（三人大笑，史提芬周望住「食神」唐牛嘅海報苦笑。）

（第二日，眾人合力炮製攋尿牛丸，「爆漿攋尿牛丸」正式開張。）
（一名老婆婆行過）
史提芬周：阿婆，整碗攋尿牛丸試嚇啦喂！
火雞：食咗唔會攋尿架！
鵝頭：好過癮架！（阿婆畀嚇走）
（攋尿牛丸好耐都冇生意，價錢由廿五文降至免費）
（一肥護士行過）
肥護士：免費唔使錢噉抵！整碗攞走！
史提芬周：噉咪做成第一單生意囉。距離上市集資近咗一大步架啦。
（肥護士將攋尿牛丸帶返醫院）
一醫生：喂！快啲攞份報告畀我吖。
肥護士：哦。（擺低攋尿牛丸）
（碗牛丸畀送去病房畀一個厭食症病人食咗。）
肥護士（異常興奮）：佢食嘢喇！
（肥護士帶住成班厭食症病人去食攋尿牛丸。）
肥護士：系呢度喇！（衝入間鋪頭）唔使錢架！你哋入嚟食啦！
史提芬周：唔使錢架？你真系嚇！做嘢！（價錢升至四十文）
（攋尿牛丸開始大受歡迎，傳媒大肆報導。）
*記者：今期嘅城市話題就系連群醫都束手無策嘅厭食症，竟然畀一粒叫做攋尿牛丸醫返好，而喺短短嘅時間重賣到街知巷聞添，而原來發明呢一粒攋尿牛丸嘅，就
系飲食界嘅傳奇人物，前唐朝飲食集團主席，曾經有食神稱號嘅史提芬周！（走向史提芬周）系啦史提芬周，點解你呢個攋尿牛丸會噉受歡迎啦呵？
史提芬周：吖！我諗問我系唔公平嘅，最好問一問啲顧客為咩事要嚟幫襯我啦！呀，細路！為咩事你要嚟食攋尿牛丸呀？
手下丙（著住校服）：呀！自從我食咗啲攋尿牛丸之後呢！啲腦筋好咗好多呀！次次考試都得一百分添呀！
記者：真系噉勁？
火雞：哦！我食咗之後咪靚咗囉！哈哈哈！
瘦骨仙：我食咗之後個人明顯高咗，大只咗，個自信心返咗埋嚟！呀！
記者：噉你今次重出江湖呢，系咪諗住東山再起呢？
史提芬周：東山再起？哈哈哈哈！
記者：噉你可唔可以總括一下攋尿牛丸嘅成功秘訣呀？
史提芬周：好簡單，好食、新奇又好玩！
記者：好玩？點玩呀？
（史提芬周將攋尿牛丸拋向天空，跟住就打起乒乓波上嚟。）
（財團老闆同唐牛睇緊電視。）
財團老闆：真系要嚟打乒乓波！有冇搞錯呀？
*唐牛：呢粒嘢呢真系……抵死得嚟好夠噱喎！我都忍唔住買咗兜！
財團老闆：冇理由畀佢……楂住多多嘢嚟發圍先得架！
唐牛：唔使咁躊躇！始終細ngai1嘢，發圍極有譜吖！
財團老闆：至怕佢發圍兼起啤咋！
（史提芬周問銀行借錢。）
史提芬周：彈牙到可以打乒乓波嘅牛丸喎！而家全香港邊個唔知呀！
經理：系咪食咗真系會攋尿架？
史提芬周：其實會攋屎架！（眾人笑）
神仙：奇跡呀。
鵝頭：一流呀。
經理：真系奇跡，難得你哋有咁好嘅開始，但系你哋攞曬所有嘢去做抵押，開二十間分店，我就覺得冒險咗啲囉！
史提芬周：你覺得冒險咗啲？
*神仙：不如開住兩間先都好啦！（史提芬周將快勞掟向佢）
經理：阿周生，你都既然贏咗第一鋪咯！唔使即刻擺曬落去再搏啫！
史提芬周：唔好講咁多廢話啦！你識條春咩？我做生意使你教？！
經理：問題系，周生，以你以前嘅記錄，對我哋銀行借錢畀你嚟講呢，繫好困難架！
史提芬周：我諗你系對我哋隻牛丸冇乜信心啫。
經理：話時話吖！真系未試過呀，我不留都好少食呢啲垃雜嘢嘅！
瘦骨仙：試嚇吖！（經理猶疑）試嚇呀！
（經理食咗啖）
（鏡頭一轉，銀行經理坐喺唐牛同財團老闆對面。）
唐牛：你真系借咗錢畀佢？
（經理岌頭）
財團老闆：唔該曬！
經理：客咩氣呀？老世你叫到我哋照做啫！
財團老闆：哼！條僆仔趷起條尾我知佢想點喇！開分店喎！
唐牛：啲分店全部開喺山旮旯，赤臘角、沙頭角，最旺嗰間喺牛頭角，重要喺地牢喎！喂！你學過風水未呀？
財團老闆：字你識睇嘞啩！（電腦將分店的位置連埋一起，顯示個「死」字）睇唔睇到呀！死路一條呀！
唐牛：多多錢都借畀佢呀！等佢死得大鑊啲！哈哈哈！
（原來史提芬周唔系開分店而系做罐頭）
財團老闆：咩呀？講多次！
職員：佢哋攞曬啲錢去出罐頭呀！
財團老闆：出罐頭？
職員：系吖！全香港二千八百間超級市場、便利店將會有得賣，所有鋪頭位置嘅分佈圖我已經set咗入電腦。（財團老闆睇電腦，見分佈圖顯示個「掂」字）
唐牛：真系估唔到呀！（腦海浮現出史提芬周講過嘅說話：「使乜講呀！掂呀！」）
（香港飲食奇才頒獎典禮）
記者：唔該借借！唔該借借！
記者：史提芬周，噉你今次入選飲食奇才有咩感想呢？
史提芬周：好似發咗場夢噉！哈哈哈！亦都證明香港系一個……一個奇跡嘅地方嚟嘅，只要你努力，夢想會成真！
（財團老闆同唐牛迎面行埋嚟）
史提芬周：衰鬼！
財團老闆：衰鬼呀！哈哈哈！（拋雪茄畀史提芬周）你去咗邊呀？咁耐都唔call嚇我，我以為你死咗咯！
史提芬周：我系死咗呀！但系點到你唔服呀！
財團老闆：點解我要服呀？
史提芬周：點估到我又返生呀得架！
財團老闆：服曬咯！哈哈哈！
史提芬周：喂！唔記得恭喜你添喎！
*財團老闆：哎！我哋大快樂攞獎幾咁閒啫！你同班街市爛鬼都攞獎噉至難能可貴吖嘛！
鵝頭：講咩呀？
史提芬周：呢個世界鑊鑊新奇鑊鑊金吖嗱！正所謂點到你唔服呀！
財團老闆：點解我又要服呀？
史提芬周：如果我唔攞呢個獎，我點有資格參加下個月嘅食神大賽呀？
財團老闆：嘩！真系服到我雙膝跪地，七個一皮咯！
唐牛：叻仔呀！
史提芬周：哎！噉我唔系想話畀人聽我叻，而系想話畀人聽我冇咗嘅嘢可以攞得返！（攞一張燒著嘅報紙點煙）
（財團老闆同唐牛相視而笑）
唐牛：喂！等我講句真心話吖！周生你得架！但系真系畀啲心機學嚇點煮嘢吖！
史提芬周：中國廚藝訓練學院，梗記得啦！報名添呀聽日！
唐牛：好咯！我見到佢噉我就開心喇！浪子回頭呀！嗱！真架嚇！無論你以前幾咁陰騭嗱喳下流賤格，只要你肯改過，我哋大家一定畀機會你架呵？嗱，嗱，唔好打我吖嗱！我個人講嘢系咁直架嘞，我個人好真架！我真系為你好架！
*史提芬周：其實我成世人，就系睇漏咗你一眼，（搣甩咗唐牛嘅假須，唐牛露出趣怪嘅表情）你睇嚇佢個樣，幾咁天真可愛呀，幾得意，幾活潑！（一直把玩唐牛面上嘅肥肉）又識攋屎又醒，點估到原來食屎最叻至得架！（發惡大力扯唐牛塊面）
唐牛：吆！（將史提芬周推開，火雞喺後面揦起個垃圾筒bok7財團老闆個頭，眾人亂作一團，史提芬週一面勸開火雞，一面用腳踢向財團老闆）
史提芬周：唔好打！唔好打！
鵝頭：唔好喐！唔好喐！
財團老闆：我要個仆街死！我要佢死！
唐牛：好呀！畀佢死囉！
（史提芬周將激動嘅火雞拖入廁所。）
史提芬周：定啲嚟！定啲嚟！唔好喐呀！唔好喐呀！（火雞攬實史提芬周，想惜佢塊面，史提芬周立即彈開，呢個時候鵝頭等人入嚟）
鵝頭：喂！喺度！喺度！全部搞掂曬！冇事！
火雞：咩搞掂曬呀？我話有事呀！我出去刮佢！
史提芬周：你慳啲吖！你呀！喐啲就開拖！我有講過喐手咩？你睇我頭吖大佬呀！你估呢度廟街呀？爛泥扶唔上壁！望咩呀？連我都喐埋呀！
（火雞憤憤然離開，眾人想去勸嚇佢）
史提芬周：唔好理佢！
（廟街，史提芬周、鵝頭、神仙、肥雪四人一齊食飯。）
史提芬周：兄弟！兄弟！大家都喺廟街起碼襯咗十幾廿年，跟住就要上軌道、搬架步，祝我哋「攋尿牛丸」生意蒸蒸日上！（乾杯慶祝）飲杯！
神仙：嗱！我再祝你聽日……返大陸學煮餸，早日學成歸嚟，攞返食神個朵！
史提芬周：關你叉事呀？講笑啫！（眾人笑）
鵝頭：各位！今晚我哋最後一晚喺呢條街，大家睇清楚，聽日我哋殺出廟街，放眼世界！
肥雪：雞姐話唔走架喎！
鵝頭：火雞又搞邊科呀？
肥雪：雞姐話「生於斯就長於斯」喎！
鵝頭：從一而終，經典呀。要搵老婆搵呢啲。
史提芬周：知你想「chap」佢好耐架嘞！（眾人笑）
肥雪：雞姐以前好靚女架！
史提芬周：原來佢想「chap」！（眾人笑）
鵝頭：喂喂喂！講真呀，三年前火雞真系嗒得杯落架！不過有一次同人霎氣，先搞到破咗相咋！
史提芬周：因咩事同人霎氣呀？
鵝頭：冇人講過，真系唔知。
肥雪：呢單嘢，問我啦！嗰日得我見到咋！昆叔嘅頭馬喪標，嚟雞姐檔嘢食燒夜，搣咗雞姐支旗。
史提芬周：搣咗佢支旗？

（回憶）
火雞：邊個搣咗我支旗呀？
（喪標攞支旗擤鼻涕）
火雞：你個仆街喺我檔口搣我支旗嚟擤鼻涕！你老味呢度冇廁紙畀你用呀？（將廁紙掟向喪標）你問過我未呀？
喪標：你講咩呀？我鍾意用嚟擤鼻涕呀！你吹呀？（將旗掟向火雞）嚇！你知唔知我邊個呀？噉同我講嘢？！唔好搣佢支旗！全部將個檔口掃曬佢！（火雞以一敵眾，喪標揦起刀斬向火雞）
廟街（現在）
肥雪：兜頭一刀，笪la1由額頭去到鼻哥寵。呢，就喺佢檔口前面咋嘛。跟住尾龍骨再中多刀，插住條孖筋，再搭住條三叉神經線，影響咗大腦中樞系統，連棚牙都爆埋出嚟呀！哎！雞姐個樣噉就一世嘞！支旗仔真陰
功！
史提芬周：咩嘢旗仔呀？
肥雪：咪你支旗仔囉！
史提芬周：我支旗仔？
肥雪：你當年食神支旗仔呀！
（回憶：當年火雞喺檔口以一敵眾。）
而家：肥雪帶史提芬周睇火雞啲旗。
肥雪：嗱嗱嗱！真系貼曬你啲公仔海報架！尤其是佢鍾意你抱啤啤仔個廣告呀！話你好有愛心。真系你天字第一號忠實FANS嚟架！
（食神諗返起唐朝分店開張嗰日嗰個學生妹。）
鵝頭：喂！噉呀真系恭喜曬喎！
史提芬周：哈哈！
鵝頭：哈哈！
火雞：肥雪！你講咩呀肥雪？（火雞打扮野艷噉出現）我問你講乜嘢呀？叫你唔好講架嘛！
（史提芬周不斷抹汗）
肥雪：其實系佢叫我借啲意講畀你聽架。（細聲同史提芬周講）
火雞：不過既然講咗就算喇。又唔系咩醜事，唔……真繫好忞嘅啫！（發曬嗲，史提芬周嚇到企唔穩）咦！你聽日自己一個返大陸架喎！冇人陪你咩？我陪你吖！（做出很姣嘅動作）
史提芬周：的士！（快快手上咗的士離去，火雞傷心落淚）
（史提芬周抵達湖南，同鵝頭通電話。）
鵝頭：你喺邊呀？
史提芬周：重有喺邊啫，喺大陸囉！
鵝頭：唔使雞噉腳走呀嘛？火雞話曬對你有情有義吖！
史提芬周：喂！唔好講咁多無謂嘢！而家我搵唔到中國廚藝訓練學院呀！
鵝頭：唔你呀嘛？我搵人check過有架喎！
史提芬周：系呀系呀！乜都有呀呢度，廁所又有呀！少林寺又有呀！系冇中國廚藝訓練學院！
鵝頭：冇理由嘅！大傻個細妹個老母個大佬個仔話有架喎！咪喇！你返嚟先啦！
史提芬周：重返嚟！我而家著緊草你知唔知呀？
鵝頭：唔使驚喎！火雞依家都唔喺度，你走咗之後佢都失埋蹤嘞！
史提芬周：去咗邊呀佢？
（史提芬周見到火雞正跑向自己呢便，即刻躉低電話逃走，一輪追逐，卒之畀火雞捉到。）
火雞：捉到你喇！終於……捉到你喇！哈哈哈哈！噉都捉到喎！哈哈！
史提芬周：噉點呀？噉點呀？
火雞：我買咗好多日用品畀你呀！你上次走得咁快，我都畀唔切你，專登攞上嚟畀你架！既然買咗唔好嘥吖嘛！
史提芬周：多謝曬呀！
火雞：喂！幫我做返啲嘢喎！（攞出一張紙卡，喺上面畫咗個心）幫我喺旁邊畫多個心，再搵支箭嘴穿住佢。
史提芬周：唔好搞咁多嘢啦！
火雞：畀我做個紀念啫。嚟吖！
史提芬周：雞姐！大家好兄弟，唔怕坦白講，即系你搞成噉樣樣呢，其實我都好遺憾，亦都好感動，但系我都唔想架嘛，你明白唔明白啫？
火雞：明，我梗明啦。嚟吖，幫我畫咗先啦。
史提芬周：畫冇問題。畫個心幾咁閒啫，但系大家好兄弟，好多嘢一定要講清楚。
火雞：喂，我山長水遠嚟到呢度嗌你幫我畫個心咋嘛！你噉都詐我型？你唔念嚇我為你做咗咁多嘢，都念嚇我為你擋咗咁多刀吖！
史提芬周：啲嘢唔系我叫你幫我做架嘛！啲刀又唔系我叫你幫我擋。噉查實關我咩事啫？如果你噉講，人人走埋嚟話幫我擋兩刀，又話要噉，又話要噉，噉我咪好唔掂？！（一人踩住單車慢慢駛近）哎！好多嘢整定架啦！有就有，冇就冇，系冇嘅你擋多廿刀都系冇架啦！你明唔明啫？
（騎單車人落車）
史提芬周：你明唔明呀？
（火雞留意嗰個人）
史提芬周：喂！明唔明啫？喂！
（火雞見騎單車人攞出把槍，立刻推開史提芬周，兜頭中咗一槍，史提芬周十分驚訝，揦起火雞手中嘅紙卡，走去路中中央，嗰個人再用槍指住史提芬周，只聽見一聲槍聲，塊螢幕黑曬，字幕：一個月後）
（一個月後嘅食神大賽。）
財團老闆：掂曬嘞！
唐牛：點會噉嘅呢？百年難逢嘅九星連珠點會咁蹺系今晚架？九星連珠必有怪異。
財團老闆：放心啦！佢會永遠消失。
主持：第二十八屆超級食神大賽重有一分鐘就開始喇！首先有請今晚嘅評判，國際美食評審主席，有味公主之稱嘅薜家燕。重有半分鐘，根據大會規定，所有遲到嘅參賽者，一律取消資格，絕對冇情講，請各位參賽者就位。
（唐牛一直好鬼緊張噉樣望住門口，恐防史提芬周會喺最後一刻出現，突然見到伸只腳出嚟，重以為系史提芬周，嚇咗一大驚，原來系主持。）
主持：我經已check過曬，真系冇人嚟，比賽即將開始。
唐牛（松咗一口氣）：仆街！嚇得我吖！
（場外，史提芬周企喺船頭向會場進發）
女記者：咦！佢咪系……
史提芬周：阿嬸，拍硬檔撐快兩步吖唔該。
阿嬸：最快系噉架喇！
史提芬周：噉冇辦法啦！（使用輕功從船上一躍跳入會場，眾人驚訝。）
史提芬周：啱啱趕得切。
唐牛：你……
夢遺大師：阿彌陀佛。
主持：請問你系邊位呀？
夢遺大師：少林寺方丈，法號夢遺。（這時夢遺大師慢慢升起）阿彌陀佛，我隨風而來，隨風而去，喂！我系史提芬周老友喎！畀嚇面得啩！喂！唔該吖！唔該吖！（原來升起系由於畀警衛抬起所致）
主持：SECU！將啲無謂人掟咗出去之後，順便閂窗落閘，唔好再畀夢遺嘅人入嚟喇！好喇！最後一位參賽者都經已趕到，比賽正式開始。
（所有參賽者立刻開始工作，唯有唐牛同史提芬周企定對視，唐牛助手想揦起刀，畀唐牛制止。）
唐牛：敵不動，我不動。
（史提芬周回憶當日畀追殺嘅事，原來嗰個殺手正想開槍殺史提芬周時，一架車喺後面高速駛埋嚟，殺手只顧閃避，史提芬周跳上車，不久之後又畀架車拋落山坡。）
（夢遺大師畀警衛拋落樓梯。）
女記者：我想問你呢，史提芬周點解搞成噉嘅？
記者乙：點解會著古裝嘅？
記者丙：點解啲頭髮會白曬架？
女記者：重有呢，見佢又踩水又飛天系咪吊威吔架？
夢遺大師：師主佢已經成為咗少林寺嘅俗家弟子。（眾人驚訝）
（當日史提芬周畀拋落山坡之後，無意中嚟到少林寺。）
夢遺大師：阿彌陀佛。一字記之曰緣，佢與佛有緣，老衲本住慈悲為懷嘅心，收留咗佢。
（當日夢遺大師收留史提芬周之後，爬上史提芬周嘅床，除咗佢條褲……）
史提芬周：喂！你！
夢遺大師：哎！咪喐！你呢，就畀啲有毒嘅躝籐呢，就拮親，而家好在呢，就未落到去百會穴啫，如果唔系呢，你就死梗架嘞！嗱，我呢，已經同你啜啲毒呢，啜到七七八八喇！而家呢就剩返呢度啫，就畀我啜埋先呀唔該呀！
史提芬周：行開啦！（一手推開夢遺大師）
夢遺大師：你既然唔畀我啜，我都唔勉強你。（講完嘢之後慢慢「飄」走，另一和尚入嚟）
和尚：你大禍喇！方丈份人好小氣架！（夢遺大師突然飛入嚟一掌就打死咗個和尚）
夢遺大師：我最憎人喺我背後講我壞話。（講完又慢慢「飄」走）
（喺會場，史提芬周同唐牛仍然對視緊，冇行動。）
（參賽者甲見有味公主望著，突然玩起雜技。）
味公主：Out！
參賽者甲：啊？
味公主：出局！
參賽者甲：我出局？
味公主：而家系選食神，唔系選馬戲班小丑，食神除咗煮嘢好食之外，台型都好重要嘅，你噉就想做食神呀？冇咁易！！！
（史提芬周回憶喺少林寺，佢想偷走，突然見到牆上面出現咗好多高大嘅人影……）
史提芬周：少林寺十八銅人？
十八銅人：冇錯！少林寺十八銅人！得罪方丈，你想走？冇咁容易！！
（史提芬周畀狂毆，有銅人重用埋折凳）
（比賽現場）
味公主：Out！
參賽者乙：啊！點解呀？
味公主：睇嚇你個樣。而家死老竇呀？苦口苦面噉，返屋企整苦瓜喇！出局！
（味公主突然跳起舞上嚟，吸引咗眾參賽者嘅目光。）
味公主：望咩呀？Out！
眾參賽者：嚇！點解呀？
味公主：作為一個食神，最緊要系專心一致嘅，我只系少少動作啫，你哋就企曬喺度嘞！成何體統？真系令我失望！Out！出局！
主持：若然再否人出局，只怕再冇人比賽架嘞！
味公主：我自有分數！全神貫注，氣定神閒，由頭到尾都冇望過我一眼嘅，只有佢哋兩個，至有資格。
史提芬周：點解要殺人？
唐牛：你教我嘅！因為我鍾意囉！
史提芬周：放下屠刀，立地成佛。
唐牛：哈哈哈哈哈！今日我佛就系佛，不過整佛跳牆。
史提芬周：咁啱嘅？我又系整佛跳牆喎。
唐牛：慳啲啦！咪以為染白曬個頭，著住套古裝就真系有計得架！呀！（又爆衫）我夠得咯！想坐食神個位？第二世啦！（二人各自開始煮）
唐牛：倚天切。
史提芬周：屠龍斬。
味公主：好刀法。
唐牛：咁快嘅？降龍十八炒。
史提芬周：打狗鏟。
味公主：好鏟法。（二人嘅煮法幾乎一模一樣）
唐牛：抗議，佢抄我！
主持：有啲噉嘅事咩？
唐牛：我做乜佢跟住我做乜。
主持：唔系啩？
（唐牛扮鬼臉）
（史提芬周學佢扮鬼臉）
唐牛：嗱！你見到啦！
味公主：比賽系噉架啦！好似游水跑步噉，又咪系你做乜佢做乜，有乜好抗議呀？抗議無效！
唐牛：死啦！（將鑊裡面嘅嘢掟向史提芬周）
史提芬周：多謝！（用鑊接住佢掟埋嚟嘅材料）
唐牛：嚇！
（史提芬周將鑊中嘅油灑向唐牛，唐牛揦起有孔嘅剷去擋，塊面畀啲油燙到呱呱嘈）
唐牛：呀！仆街！（再將檯面幾把刀掟向史提芬周，畀史提芬周全部接住。）睇你重有冇手接！（將最後一把掟出，史提芬周跳起將刀踢返，正中財團老闆）
財團老闆：哎呀！
Richard：阿叔！冇事！冇事！刀背嚟咋！刀背嚟咋！
財團老闆：刀背嚟咋咩？超！
唐牛：真系去咗中國廚藝訓練學院？
史提芬周：唔好扮喇！中國廚藝訓練學院即系少林寺嘅廚房。你亦都系少林寺走出嚟嘅叛徒。
唐牛：冇理由嘅！我學藝十年，你只系去咗一個月，冇理由咁勁！
史提芬周：呢啲嘢好講天分。

（史提芬周回憶喺少林寺再次偷走時）
十八銅人：少林寺十八銅人！
史提芬周：哈！衰鬼！（再度畀毒打）
（冇耐，史提芬周同十八銅人賭錢）
銅人甲：細細哋十吖！
史提芬周：十一隻系嘛？
銅人甲：大呀？
史提芬周：哈哈！
銅人乙：囡呀！
史提芬周：囡呀？我幾時先可以行出呢笪地方呀，兄弟？
銅人甲：二呀！喂，除非方丈話冇嘢喇！
史提芬周：噉方丈幾時先算數得架大佬呀！真系！
銅人甲：你睇嚇！（指著掃地名伯）嗰個老嘢呀，十三歲嗰陣時得罪方丈呀！
銅人乙：系咯！咪一直韞到而家都重韞緊咯！
史提芬周：即系點呀？
銅人甲：花大吖嘛！即系點呀？鋤大啲呀！炒呀呢鋪！
史提芬周：仆街！欺人太甚呀！（翻檯）
十八銅人：少林寺十八銅人！
史提芬周：呀！（又畀毒打）
史提芬周（旁白）：我唔單止喺少林寺嘅廚房學會煮餸嘅秘訣，更加喺十八銅人身上學會上乘嘅武功。呢一拃金粉餅果然名不虛傳！
唐牛：我唔信！呀！（飛向史提芬周，並一直大叫）
味公主：好輕功，輕功奧妙之處系可以令一個好似海狗咁重嘅人，飛到老年咁高，其間重可以鬼殺咁嘈。
（史提芬周揦起折凳將唐牛打落地，並繼續狂毆）
*味公主：好折凳，折凳奧妙之處系可以藏於民居之中，隨手可得。嚇！重可以坐住佢嚟掩藏殺機，就算畀差人拉到亦都銼你唔入，真不愧為七種武器之首。
主持：喂！喂！打多兩下好喇！重有三分鐘，因住時間呀嚇！（二人又返去繼續煮）
（財團老闆攞出一個搖控器。）
夢遺大師：咪嘈！弊！（在會場外）
史提芬周：弊？點弊呀？（見唐牛走開，知道事有蹺蹊，立刻將手中佛跳牆拋開，畀主持接住，佛跳牆即時爆炸。）
財團老闆：哈哈哈哈哈哈哈哈哈！
*主持：佛跳牆整到會爆炸，系唔容許嘅，應該否你出局架喇，不過念在幾有創意幾夠噱，重有兩分鐘，整過個啦！
唐牛：哈哈哈哈！剩返兩分鐘你整魚生就得，認輸啦僆仔！（發功令火變大）
味公主：好內功！原來系用內力，加速提高溫度，使到原本要燉七七四十九個鐘嘅佛跳牆，家下喺兩分鐘之內就搞掂。
史提芬周：請問大師，一生人食過最好食嘅嘢系咩嘢？
夢遺大師：施主，呢個問題應該要問返你自己。（喺會場外）
史提芬周：問我自己？
夢遺大師：冇錯。（喺會場外）
女記者：大師呀大師，你同邊個講緊嘢呀？
夢遺大師：呢啲系千里傳音。（喺會場外）
（史提芬周全神貫注整叉蛋飯。）
味公主：嚇！呢招系？
唐牛：九陰真經？
夢遺大師：錯！呢招系「黯然銷魂手」。（在會場外）
女記者：「黯然銷魂手」。
夢遺大師：呢招系施主由心而發嘅自創招式，有一日，我見到施主好黯然噉，喺度唱歌……
回憶……
史提芬周（唱）：情與義，值千金，刀山去地獄去有何憾！為知心，犧牲有何憾！為嬌娃……（終於忍唔住痛哭起嚟）
（會場外）
夢遺大師：施主佢一夜白髮，情深義重，問世間情是何物，直教生死相許，我見施主佢癡心一片，所以我就原諒咗佢。（流淚）
女記者：估唔到大師都系性情中人。（同夢遺大師抹眼淚）
（會場內，史提芬周全力煮叉蛋飯，更將蛋擺喺手掌上煮熟。）
味公主：少林絕學「火雲掌」！
主持：夠鐘，比賽完畢。
味公主（先評唐牛嘅佛跳牆）：好香呀！
戴龍：嘩！好香呀呵？
廚師甲：系呀！系呀！系呀！
味公主：呢盅就系……
唐牛：超級無敵海景佛跳牆！
味公主：（試咗一啖）好！好！好！呀！呢盅由內功燉成嘅佛跳牆，不但火侯十足，而且濃得嚟唔滯，膠得嚟又唔腍，九種材料均為極品，足足有九九八十一種變化，不但香味層次不同，而且可以渾然一體，不愧為超級無敵海景嘅佛跳牆！
唐牛：哈哈哈哈哈！
味公主：呢碗系？
史提芬周：黯然銷魂飯。
唐牛：你老醒你！叉飯呀叉飯啦！加多只荷包蛋畀盡你咪廿二文碗！黯咩然銷咩魂飯呀？咪讕有型呀僆仔！
主持：荒謬！我夠膽講句，喺我面前冇人夠膽講話讕有型！唔該你靜啲。
味公主：（試咗叉燒飯）叉燒呀！好叉燒呀！我從來未食過咁好味嘅叉燒呀！救命呀！！！
唐牛：呀！！！！！
*味公主：叉燒嘅肉汁封喺纖維裡面，好似江河匯聚噉樣，而裡便嘅筋脈畀內力打碎，入口極之鬆化，再配合埋火雲掌煎成嘅糖心荷包蛋，嚿叉燒真繫好味到塵世間冇嘢可以形容得到架！點解呀？點解呀？點解呀？
點解我食咗碗咁好食嘅叉燒飯？我第日食唔返點算呀！！（暈了在地，突然流出眼淚）咦！系咩嚟架？點解我會流眼淚嘅？有一種哀傷感。
史提芬周：系洋蔥！我加咗洋蔥！
味公主：呀！實在太點題嘞！原來系洋蔥嚟架！唔！呢碗飯食到人感動流淚！呀！唔怪得之叫做黯然銷魂飯啦！實在太黯然！實在太銷魂！實在太好嘞！可惜……
味公主（心諗）：如果唔系我老公唔生性爛滾，畀佢哋捉咗黃腳雞。呀！我又爛賭貪心，畀佢哋捉到我打牌出老千。呀！最慘嘅就系……
Richard：（帶住味公主嘅仔）叫大佬吖！
味公主子：大佬！
味公主（心諗）：連我嘅乖仔都畀佢哋踢埋入黑社會。咁多痛腳畀班衰人楂住嚟要挾我，我……我……
味公主：今晚嘅食神系……唐牛！
財團老闆：唐牛至系食神！！！Yeah！（眾拍手）
唐牛：講咁多嘢始終咪又要畀我！
史提芬周：根本就冇食神！
味公主：啊！咩話？
史提芬周：或者人人都系食神！
味公主：咩話？
財團老闆：唔好講咁多！頒獎！
史提芬周：老竇老母、阿哥細佬、條女條仔，只要用心……
味公主：咩話？
史提芬周：人人都可以系食神！
唐牛：條友輸到黐咗線喇！快啲同佢Call白車吖！
（天上突然傳出聲音：「食神歸位！」會場四處爆炸，天上射出一道光柱直入會場，原來系觀音下凡！）
觀音：食神！你本來系掌管煮食嘅神仙，因犯天條，而被罰落凡間受三十六劫、七十二難，今日你終於領悟到食嘅真諦，真正得道。（施法令史提芬周著上神仙服）剛才你所煮嘅飯真情流露，連玉帝都深受感動。但系你動用咗神心，洩露天機，本應受罰，但姑念你一往情深，故網開一面。（史提芬周叩頭）
財團老闆：哈哈哈！哈哈哈！史提芬，你都算落本喇！玩到出神仙嚇嘩！好！出神仙又睇嚇點！（攞出長槍對住觀音開槍）出神仙吖嗱！出神仙吖嗱！
觀音：你只烏嘴狗，偷食唔守門口，而家要將你打回原形！（施法令財團老闆變成一隻狗）
（唐牛拿住長槍想射觀音）
觀音：你都想試嚇哩？
唐牛：冇冇冇冇冇冇！我唔關事架！我行過架咋！呢！呢度啲人呢，我完全唔熟架！尤其是嗰邊楂槍亂咁啡嗰啲呢，我特別唔識架！
觀音：廢話！狗都不如！（向唐牛施法）
唐牛：呀！呀！呀！呀！（突然一切回復平靜）
Richard：呀！阿叔真系變咗隻狗呀！
唐牛：荒謬！又唔見我有事！幻覺嚟架啫！嚇我唔到嘅！
Richard：呀！！！！
唐牛：呀！！！！（見到自己身體穿咗個大寵）
（廟街）
相士：咩都有可能嘅！聖誕節吖嘛！額有朝天骨，眼中有靈光，神仙托世呀你！
睇相者：有冇咁多神仙呀？
相士：有！所謂舉頭三尺有神靈，其實通街都系神仙，呢！聖誕老人呀！都系神仙嚟架喎！
睇相者：哼！你都越講越離譜嘅！（動身想走）
相士：咪住！神仙唔啱聽咪講返姻緣，睇過，所謂姻緣天注定……
（另一邊）
史提芬周：有噉嘅事？唔系啩？
鵝頭：真系呀！我哋唔去睇比賽呢，都系佢叫嘅！驚你分心喎！
神仙：系呀！
史提芬周：唔系啩？
鵝頭：真系喎！粒子彈呢，畀佢金牙擋住，不得止冇死到，醫生重幫佢換埋棚牙，順便磨埋塊面，執返企理個嘜頭添呀！
史提芬周：唔系啩？
鵝頭：真系喎！呢，都嚟緊喇！（變返靚靚嘅火雞慢慢行埋嚟）
火雞：啱唔啱睇呀？（史提芬周默不作聲）
鵝頭：喂！啱唔啱睇都講句嘢吖！
史提芬周：事到如今講多無謂呀！畀返你！（將畫咗兩個心紙卡飛畀火雞）
（劇終）