周星馳-國產凌凌漆 (粵語劇本)

與某妓女嘅對話

外景：深圳某一市場豬肉攤前。
某女甲：你以為你匿喺度就搵唔到你咩？冇用架！你啲咁出色嘅難忍（男人），無論喺邊度，都好似漆黑中嘅螢火蟲一樣，咁鮮明，咁出眾。你憂鬱嘅眼神，唏噓嘅鬚根，神乎其技嘅刀法，同埋嗰杯Dry Martine，都徹底噉將你出賣咗。不過，你雖然系咁出色，始終行有行規，無論典（點）你都要找埋尋晚嗰條過夜數，叫雞唔使畀錢呀？
凌凌漆：我重估我哋嘅交往系建築喺感情之上，估唔到，原來都系一盤生意。
某女甲：講感情都要畀錢架。
凌凌漆：明白嘅，有一早畀咗你啦。但系近排興食齋，冇乜人幫襯，不如噉啦，攞篘豬肉返去頂住數先啦。嚟吖，粗粗地，唔該。
某女甲：你好嘢，山水有山逢。（某女甲提豬肉轉身走。）
凌凌漆：有興趣嘅不如今天再相逢啦。
（某女甲把豬肉投向凌凌漆）
凌凌漆（用刀接住豬肉）：慳番。（順勢將豬肉切成兩半，掛喺豬肉鉤上）
某女乙：咩話？個衰佬唔肯畀錢？我幫你拖馬喐佢！
某女甲：算啦，話到尾，佢始終都系一個獨一無二、風度翩翩嘅豬肉佬。
（阿漆依著豬肉攤，品著白蘭地。）

同達聞西嘅對話

（達聞西提住菜藍，踏住積水而來，見到阿漆，突然停住，擺出架勢。）
達聞西：力拔山兮氣蓋世……
凌凌漆（酒杯落地而碎）：時不利兮騅不逝。
達聞西：阿漆。
凌凌漆：聞西。
達聞西：我都系希望你叫番我全名——達聞西。
凌凌漆：冇問題吖，聞西。
達聞西：多謝。
凌凌漆：唔好客氣，聞西。
達聞西：國家終於有任務畀你喇。
凌凌漆：系咩？
達聞西：嗯。
凌凌漆：終於都肯搵我嘞咩？（舉刀將砧板劈開）

司令傳達室與杜鵑嘅對話

（一女子正化妝。凌凌漆背後插刀，頭戴禮帽，口含香煙。順手將帽飛到衣架上。）
凌凌漆：點啊，玫瑰？瑰，十年冇見都重系咁靚。
杜鵑：我唔系十年前嘅玫瑰呀，她喺上年過咗身喇，我系佢個女杜鵑。
凌凌漆：（驚訝地）咁大個女喇？嚟，畀叔抱嚇先！
杜鵑：嗯—，遲啲先啦！司令等咗你好耐喇。
（櫃子移開，一道門顯露出來）
杜鵑：你入去先啦。
凌凌漆：好，叔叔好快返嚟呀。
杜鵑：好啊。
凌凌漆（快到門口，將豬肝掉到杜鵑桌上。）：嚿豬膶攞去滾滾湯，補補血 吖。（一回頭，撞落玻璃門度，一張扭曲嘅臉。）
杜鵑：你太耐冇返嚟喇，都唔記得有度玻璃門。

佈置任務

（密室內，人員都好忙做緊嘢，凌凌漆睇見司令，行過去）
凌凌漆：（敬禮）司令！
司令：凌凌漆，你嚟喇。
（警衛走過來）
警衛（敬禮）：呢度唔准食煙架。（阿漆將煙頭喺警衛手中撳熄）
警衛：唔准帶武器啊。
凌凌漆：哎，對唔住，作為一個刀客，刀不離身。
司令（對警衛）：（普通話）算了。（對凌凌漆）刀客？哈哈……
凌凌漆：等咗十年，我重以為國家經已忘記咗我添。
司令：點會呢？就算系一張廁紙，一條底褲，都有佢本身嘅用處加嘛。
凌凌漆：呢個比喻真系一流！我已做好準備，接受任何工作。
司令：（普通話）好！有道是養兵千日，就用在一時。（粵語）最近我哋發現咗世界上最大嘅暴龍化石，（實驗開始，在實驗各種稀奇古怪的殺人武器）但系恐龍頭唔見咗。偷盜嗰個人嘅身份系相當嘅神秘，嗯，我哋淨系知道佢用嘅系一支無堅不摧嘅金槍，同埋身上著有一副刀槍不入嘅盔甲。呢個價值連城嘅國寶，我哋懷疑同香港嘅走私大王賴有為有關。所以我哋派你去調查。
凌凌漆：噉有冇睇豬羅公園？
司令：冇。侏羅紀就睇過。
凌凌漆：啱，系侏羅紀。暴龍究竟系鬼鬼崇崇走嚟走去嗰條定還是「哈—哈」嗰條呢？
司令：系「哈—哈」嗰條。
凌凌漆：咦，嗰條好冇人性，專追啲細蚊仔嚟咬個噃？
司令：唔會，肯定中國呢條唔會。
凌凌漆：哦——。
司令：（普通話）我們特意找來了十年前訓練你的那個達聞西做你的後勤。（粵語）嘿，聞西——
（達聞西屙完尿，轉番身，敬禮）
聞西：司令，系達聞西。
凌凌漆：聞西，進行成點啊，聞西？
聞西：我最近發明咗幾樣新嘢，相信可以幫到你。（聞西從背後攞出一件樣嘢）
凌凌漆：電筒？
聞西：錯，呢支唔系普通嘅電筒，呢支系唔使電心嘅太陽能電筒，喺有光源嘅時候佢會著……
司令：噉如果冇光……
聞西：絕對唔會著。
凌凌漆：有冇可能冇光都著呢？
聞西：問得好，熄燈。
工作員：系。（熄燈）
聞西：只要攞另外一支電筒出嚟，照住佢，佢就會著架喇。（用另一支電筒照住原來支電筒）嗱，系咪呀？
司令：開燈。
工作員：系。（開燈）
凌凌漆：呢個發明幾有創意嚇。
司令：嗯。
聞西：嗱，大家睇嚇嗰便個守衛，我就當佢系金槍人。
（聞西攞出一個神秘嘅皮箱，極其嚴肅地裝上四個箱腳）
聞西：呢張系超級間諜凳，系畀人坐喺度長時間監視敵人用嘅，（指住警衛）我問你怕未？
（警衛扭轉個頭）
聞西：嗱，怕咧，系咪呀！
凌凌漆：呢個發明都幾勁。
司令：（普通話）不錯。
聞西：重有，我家下研究緊一種集合十種殺人武器於一身嘅超級武器霸王。若果畀我實驗到呢，噉就……
司令：阿聞西，有乜嘢，去到我辦公室再傾啦，嚇。
聞西：（一路行一路講）阿漆，呢十年你一直做豬肉佬呀？
凌凌漆：應該話系一個唏噓嘅豬肉佬。
聞西：我何嘗唔系一個坎坷嘅賣菜仔呢？好采有份兼職，喺中央精神病研究所做研究工作。
司令：負責做啲咩？
聞西：畀人研究。
司令（點頭）：（普通話）不錯。
司令：凌凌漆，你要記住，龍頭骨標誌住我哋國家嘅尊嚴，絕對不容許落喺外國人嘅手上，追查過程中你嘅身份要絕對保密。重有，金槍人嘅身份系極之其神秘嘅,而且心狠手辣，你隨時會有生命危險。凌凌漆，你重有咩問題？
凌凌漆：可唔可以唔去？
司令：唔得，聽日一早你就要出發，到咗香港之後，就有人同你接頭。
凌凌漆：系。
司令：重有冇其它事？
凌凌漆：冇。
司令（攞出一沓錢，抽出最底兩張大嘅）：呢個系我私人贊助你嘅二百文，好好地買番件衫先去香港，唔好丟我哋國家嘅面。
（凌凌漆攞住錢，喺聞西面前揚，聞西瞪大只眼睇住）
司令：聞西！
聞西：系。
司令（抽出最上五毛錢）：去同我買杯奶茶，記得找錢啊。
聞西：系。
凌凌漆：聞西，司令，今次我要為國爭光呀得。
聞西：講得好，好兄弟！
凌凌漆：好兄弟，講得好！
聞西：好。
（凌凌漆咚一聲又撞落玻璃門，跌低落地）

凌凌漆嘅房間

凌凌漆喺自己房內打扮，台上放住1965年版間諜手冊，社交英語速成。
凌凌漆用風筒吹頭，之後手持手槍，擺咗個好有型嘅007姿勢。

去錯麗晶酒店

（凌凌漆穿一身黑衣，頭戴禮帽，手提皮箱，款款而來。字幕：香港）
（凌凌漆同一女子好似有說有笑步入酒店。女子見到熟人停住，凌凌漆逕自走到總台前。凌凌漆盯看酒店內女人嘅性感形象，睇到入曬神）
酒店服務員：Can I help you,sir?
凌凌漆：系啊，yes，well，我經已book咗房。
酒店服務員：請問貴姓呢？
凌凌漆：My name is 凌凌漆。
（一個鬼妹經過，想凌凌漆打招呼，漆回以挑逗眼神）
酒店服務員：唔好意思啊，冇你個名喎。
凌凌漆：咩話？有噉嘅事？（從袋裡面攞出一張地址遞畀服務員）請你查真啲吖。
酒店服務員：哦，對唔住啊，你book嘅唔系麗晶酒店，你book嘅系麗晶大賓館。
（鏡頭轉向一間破舊嘅招待所，凌凌漆仰望到麗晶大賓館破落嘅門牌，皮箱不覺落地）
凌凌漆：Shit！

入住麗晶大賓館

（凌凌漆由一「女」領班（又系男扮女嘅專家李健仁）領住，進入一房間）
領班：老細，見你咁有型，又戴帽又盛噉樣，呢間房收呢七十啦，每日十二點鐘前checkout啊，嚇。
（凌凌漆環顧房間，在桌上發現一本色情雜誌，揵開中間頁，見系一裸體女郎）
領班：喂，戴副立體超睇吖，過癮啲架。
凌凌漆：系咩？（接過立體眼鏡睇，裸女胸部大咗好多）哦——
領班：點啊？得唔得啊？
凌凌漆：得，不過呢味嘢，我唔繫好啱架。
領班： 噉你叫唔叫雞吖？
凌凌漆：好呀，咩質素吖？
領班：有北姑有陀地，百五文全套。
凌凌漆（諗咗一陣）：試嚇陀地吖。
領班：好啊。（開始踎低除凌凌漆條褲）
凌凌漆：阿嬸，你喺度做咩啊？
領班：我幫你脫褲囉。
凌凌漆：點解要噉做呢？
領班：你要陀地吖嘛，我喺呢區起曬朵架啦。
（聽到一拳，領班應聲倒地。忽然水龍頭打開，凌凌漆論盡地攞出槍，喺空中亂抓幾次先攞穩，一陣白霧升起，喺空牆上寫住：「正午三角公園見，紅玫瑰為記」）

李香琴屋企

（阿漆食住支煙，環顧房間，阿琴唱住歌）
凌凌漆：香港美女多，我睇你都好有愛心喎，你經常喂嘢畀啲狗食嚇。哎，乜你鍾意畫畫嘅咩？
阿琴：系啊，你呢？
凌凌漆：我馬馬啫，我劏豬嘅。……咩歌啊？
阿琴：李香蘭。
凌凌漆：哦，張學友嗰首李香蘭，我識，不過唔繫好熟，李香琴我熟啲。
阿琴：是咩？我個名咪叫李香琴囉。
凌凌漆：你叫李香琴？
阿琴：系呀，我叫李香琴。
凌凌漆： 哈——哈——哈，你叫李香琴，噉李香蘭梗系你阿媽喇？
阿琴：系啊，李香蘭真系我阿媽啊。
凌凌漆：哈——哈——哈——哈，李香蘭是你啊媽？（順眼一睇，地上有煙頭）你食唔食煙架？
阿琴：唔食。
凌凌漆：出嚟吖，（凌凌漆掹出槍，對準衣櫃）出嚟啊！
凌凌漆（分析道）：你唔食煙，冇理由個煙頭喺地下度，加上櫃門虛掩，好明顯有第三個人匿埋喺裡面嚟！（撥開阿琴）你行埋一便，好危險啊。出嚟！（向衣櫃踢去，腿 卡住喺櫃門度）
阿琴：（執起煙頭）你系唔系食健牌架？
凌凌漆：喂，你點知架？
阿琴：煙頭系你自己抌架。
凌凌漆：噢，Shit！
阿琴（打開櫃門，取出凌凌漆剛放入去嘅鞋）：嚟吖，著番對鞋。（回頭，卻見凌凌漆端坐於梳化上。）
凌凌漆：經過咗舟車勞頓，無可否認，我系神經過敏咗少少，但系我可以大膽講句，我絕對系一個優秀嘅特務嚟。
阿琴：嗯，畀番對拖鞋我先。
凌凌漆（將拖鞋除出遞畀阿琴）：今次我接受國家嘅任務，亦都系有備而嚟嘅。（打開皮箱）嗱，好似呢個model嘅F40噉樣，表面上系一個大哥電話，但你睇到呢度有一層金屬網膜，實際上，（按一個鈕）佢系一個須刨嚟嘅。（安然剃鬚）呢個系方便我哋出席一啲宴會場合，能夠神不知鬼不覺噉刮鬚。（又攞出一個須刨刀） 呢個model911表面上系一個須刨，實際上，（除帽攞住）佢系一個風筒（用「風筒」吹頭）。
阿琴（手上攞起另一個風筒）：使唔使咁多風筒阿？
凌凌漆： 風筒只系佢表面嘅掩飾，事實上，佢系一個須刨嚟嘅。問你死未？
阿琴：唔怪得知你咁靚仔啦。
凌凌漆：又唔好噉講。
阿琴：噉你唔見咗個風筒呢？唔知點算呢，可？
凌凌漆（一聳肩）：哼，難我唔到，我並唔系浪得虛名。其實我著緊呢對鞋——都系一個風筒嚟嘅（吹風，梳頭）你知啦，作為一個特務，儀表系幾咁緊要得架。哎呀， 唔該，有冇兩粒筆心電啊？啱啱冇電添，真系。
阿琴：冇喎。
凌凌漆：算啦，由佢，遲啲先搞。
阿琴：我真繫好想知道，你個咁優秀嘅間諜，系用咩槍，可唔可以借我睇嚇？
凌凌漆（一笑）：唔怕失禮講句，槍其實我唔繫好在行，我嘅強項系：飛刀。
阿琴：飛——刀？（窗外天氣驟變，雷電交加）
凌凌漆：冇錯，飛系小李飛刀個「飛」，刀系小李飛刀個「刀」。（不約而同企起身）
（凌凌漆抽出飛刀，彷彿瞄準一米老鼠玩具。一漂亮的出刀姿勢後，刀卻插在空牆上。）
阿琴：犀利。
凌凌漆：基本上——
阿琴（一擺手）：知架喇，言歸正傳啦。（攞出一箱武器）身為一個間諜，點都應該對槍系有啲認識嘅。呢支UFO來福槍，適合遠距離狙擊，射程兩百米；呢種叫做224痰罐子彈， 系我特別配製專用嘅。
凌凌漆：我鍾意呢個名字。
阿琴：357左輪密林，配備有爆破子彈添啊。
凌凌漆：呢啲孔龍射唔射得死啊？
阿琴：噉就要搵只試嚇先知喇。（阿琴喺暗處裝上子彈）中國制PPK，系國內間諜專用，射程一百二十米，缺點就是聲音太大，但系用埋呢個滅聲器之後，殺人就可以無聲無息啦。（琴裝上滅 聲器，用槍指住凌凌漆）
凌凌漆：呢個唔知系咩嚟嘅呢？塞咗啲咩嘢喺裡面？
阿琴：我諗系棉花啩。
凌凌漆：系棉花咁cheap嘅咋咩？（阿琴扣緊扳雞）唔知廁紙得唔得呢，呵？
阿琴（放聲大笑）：你靚仔得嚟，都幾抵死嘅。
凌凌漆：睇唔到嘢嘅，喂。（阿琴欲扣扳雞，此時凌凌漆卻已旋下滅聲器）都幾骨致喎，唔知呢支啱唔啱呢。原來我支都啱用，可唔可以畀我試嚇？
阿琴：好啊，你想點試吖？
凌凌漆：好大雨，等我閂閂窗先好嘛？
（阿漆將槍放喺檯面，轉身去關窗，阿琴攞起槍對準凌凌漆頭開火，點知子彈卻後射，射中自己右膊頭。阿琴一聲驚叫）
凌凌漆：做咩啊？你中咗槍嘅？
阿琴：試槍啊！
凌凌漆：呢支系倒後槍，一開就向後射架喇。
阿琴：你唔早啲講！
凌凌漆：啲血系噉飆，等等我。（轉過身，從箱中搵嘢，阿琴倒過槍口射擊，點知都系射中自己左膊頭，更大聲地痛叫）
凌凌漆：你做咩啊？！
阿琴：我喺度試槍。
凌凌漆：又賴嘢咧？你做咩唔早同我啫，呢支槍全名叫做蠱惑的槍，向後射完再向前梅花間竹噉嚟加嘛。
阿琴：你唔早講！
凌凌漆：啲血系噉飆，嚟吖，攞塊膠布嚟粘住先啦，快啲。
（阿琴轉身跑向洗手間，喺洗手間阿琴聽到類似電話嘅鈴聲，揵開馬桶蓋，原來系司令嘅遠程視頻會議系統）
司令：阿琴，做咩你滿頭大汗噉？
阿琴：我啱啱沖緊涼啊。
司令：凌凌漆喺邊啊？
阿琴：重喺度，但系你放心啦，我好快可以完成任務架喇。
司令：唔好喐手住，宜家計劃有變，去到賴有為屋企，先至殺佢， 噉就可以嫁禍埋畀賴有為，而且絕對冇人懷疑係我哋做嘅，等多一日添啦。
阿琴：嚇？ 重等多一日？
司令：嗯？乜你成身血嘅？
阿琴：冇，我啱啱刷緊牙，流牙血啫。
司令：你用啲咩牙刷啊？掃把嚟架？
（凌凌漆推門而進）
凌凌漆：點啊，你？
司令：hi，凌凌漆。
凌凌漆（敬禮）：司令，喺個屎坑度都能夠見到你，真系開心！
司令：點啊？你兩個合作合作成點啊？
凌凌漆：好，阿琴個人人品好，又冇乜架子，做朋友真是一流。阿琴，你又覺得我個人點啫？
阿琴： 你除咗靚仔之外我冇咩好講。
凌凌漆：重有嘅，遲啲你就知喇。
司令： 希望你哋兩個早日完成任務。
凌凌漆（阿琴共同）：是（知道）。
（司令關閉系統，阿琴將馬桶冚番住，並沖水）
凌凌漆：阿琴，攞番支槍先。
阿琴：唔該。
凌凌漆：唔好喐，等我幫你。（貼膠布）
阿琴：塊藥水膠布呢留番你自己用啦，我冇事呀，唔該！
凌凌漆：聽我講，以後真系唔好立亂試槍。
阿琴（向上頂連續射數槍）：我鍾意試槍啊，得唔得吖？（吊燈跌落阿琴頭上……）

初顯飛刀絕技

（在香港一餐廳。阿琴頭上交錯叉貼住膠布）
凌凌漆：夥計。
夥計：系。
凌凌漆：你哋呢度啲豆腐花又話最出名嘅，你們這最有名的。
夥計：系啊。
凌凌漆：臭架喎。
夥計：出名臭吖嘛。
凌凌漆：噉唔該可唔可以攞啲出名好食嘅過我呢？
服務員：都系豆腐花囉。
凌凌漆：唔系啩？
服務員：系呀，你當佢臭豆腐噉食，觀感就會fit曬。
凌凌漆（兩人對笑）：噉畀多個炸嘅我吖。（對阿琴）香港嘅商場真系包羅萬有啊，呵？
阿琴：系啊。
凌凌漆：你嘅槍傷冇大礙吖嘛？
阿琴： 皮外傷啫。
凌凌漆：以後真系唔好立亂再試槍啊。
阿琴：早知跟你學刀啦。
凌凌漆：教你又唔敢，但我講你聽，真正刀法並唔系用手，你估用咩呢？系用道氣，所謂以氣御刀，當去到最高境界嘅時候，塵世間冇嘢系斬唔斷嘅（阿琴聽唔入，放低筷子）
凌凌漆：嗱你唔信，我攞把餐刀你試嚇。
阿琴：唉，得喇，食嘢啦。
凌凌漆：琴，我睇你個樣，唔系重嬲緊我系咪？
阿琴：傻啦，我點會唔嬲你啊？我絕對嬲你啦。
凌凌漆：唔系啩？有幾嬲啫？
阿琴（阿琴擺手示意，凌凌漆將頭伸過去聽）：嬲到宜得一槍打死你。（兩人相視一笑，此時閃光燈起，被人拍下剛才嘅情景。）
兩人：僆仔，整咩啊，你啊？
攝影者：唔好緊張，唔好緊張，你兩個一睇我就知道系藝術家嚟架啦，我家下喺度搵緊啲有關愛情嘅題材，頭先見到兩個嘅神態，就知道系沐浴喺愛河嘅情侶，所以先情不自禁但影咗落嚟，希望兩位唔好介意。
（兩人同時看照片）
攝影者（又拍一張）：嗰張相我送畀你啲吖，嚇，呢張我keep吖，多謝兩位。
凌凌漆：噉點好意思啊？（凌凌漆將照片遞畀阿琴）
阿琴：唔好客氣，你要吖。
（凌凌漆將照片放入襯衫袋。吐一口痰到鄰桌嘅三人中嘅某人身上）
某人甲：先生，呢個痰系唔系你吐架？
凌凌漆：系啊系啊，冇錯，點呢？有咩問題呢？
某人甲：哦，冇冇冇，得個知字啫。
凌凌漆：聽你嘅口音，好似系湖南嚟個噃。
某人甲：系啊！
凌凌漆：噉大家同鄉喇，湖南邊處啊？
某人甲：東萍糊草頭鄉。
凌凌漆：我又系喎！
某人甲：咁喬？你系邊條村架？
凌凌漆：上陽村囉。
某人甲：咦——啱喇，我哋幾個都系喎！
凌凌漆：系啊？！（兩人親熱地握手）
某人甲：哎呀，真系他鄉遇故知喇！
食客（經過）：借借，唔該。
凌凌漆：村口呢，長期擺隻狗喺度吠人加嘛。
某人甲：隻狗咪我養嘅囉，後尾重無端端失咗蹤添啊。原來畀人煲咗嚟食啊，啲骨頭呢，重噉立亂抌喺村口度啊，真系冇陰功喇。我諗咁殘忍嘅嘢唔會系你做架，系咪？
凌凌漆：嚇？嗯……唔系唔系。
某人甲：塊面紅曬嘅？
凌凌漆：冇紅，冇紅，呵呵。
某人甲：笑得咁尷尬架？
凌凌漆：冇尷，唔尷尬，唔尷尬。
某人甲：我思疑係你做個噃。
凌凌漆：冇啊，唔……系
某人甲：真系唔系你？
凌凌漆：唔系……唔系
某人甲：真系唔系你做嘅？
凌凌漆：真系唔系咧，真系……
某人甲：唔系你？
凌凌漆：唔系，真系唔系……
某人甲：系咪你先？
凌凌漆：唔系啊……
（凌凌漆被幾個連拉帶扯快速帶出餐廳）
凌凌漆：真系多謝曬喎。
某人甲：哎呀，唔好講啲噉嘅嘢啦，一餐半餐你唔好咁客氣，唔好咁客氣啊，總之一句說話講曬，我哋湖南人呢，就唔衰得嘅，嚇，縱有一日就能夠衣錦還鄉。
凌凌漆：噉我都唔阻你哋喇，他朝有日再相逢嘅話，食早餐我請。再見。
某人甲：噯噯，唔好行住（轉身抓住凌凌漆手臂，露出插喺腰間嘅手槍）不如噉啦，等埋我兩個同鄉過隔離攞少少嘢，好快返嚟，我哋周圍行嚇。
凌凌漆：多謝喇，我哋重有啲事要辦……
阿琴：唔緊要，難得有機會同啲老同聚舊，咪傾嚇偈囉，我都要去洗手間。
凌凌漆：又得啫。
（阿琴自信地走了，兩位同鄉到隔離首飾店打劫）
某人甲：湖南人之中你都算幾靚仔喇喎，哈。山東人長得你恁帥的還真少。（凌凌漆睇到有個人好似想偷襲）我一睇啊，就知道你個人系注重儀表架喇，其實你除咗頂帽仲靚仔。（原來嗰個人系同自己個仔玩）你以後唔好帶咁多帽啊，以前我呢都系戴帽架，後尾有人話畀我聽戴帽會禿頭嘅，所以我就唔戴喇……只系攞一啲嘢，攞咁耐嘅？
細路老竇：（喺個仔後面厾咗一下）仔仔，點啊，仔仔，嬲老竇啊？次次都系你玩老竇，老竇同你玩一次都唔得？（同凌凌漆相視而笑）好啦，老竇同你買爆谷喇。
細路（好開心）：真嘅？好啊，快行咯！
細路老竇：哈，你個衰仔，又玩我！打你……
湖南老鄉：（打劫完畢，又朝受傷倒下痛苦呻吟嘅店員開咗幾槍）叫咗你唔好嘈架啦。
某人甲：哎，返嚟喇。
細路（自己喺度玩，對住空氣）打！打死你……
警察（尾隨而至，槍瞄準兩個賊）：差人，企喺度！
（兩人向警察開槍，樓內秩序大亂，激戰一陣）
某人甲（勒住凌凌漆）：唔好喐啊，大家同鄉一場，幫我頂住先！
另外兩個同鄉（將小孩子劫住作為人質）：咪過嚟啊，冚家產！
（一警察中槍受傷）
另一警察：夥計，有冇事啊？（用對講機）calling總台，calling總台！即刻叫白車嚟吖，有好多人中咗槍啊！呢度系皇室堡四樓，OVER！
老鄉（劫著人質撤退）：行開！行開啊！唔好埋嚟……
小孩老竇（買咗爆谷返，個仔被搶）：德仔，德仔！
老鄉：咪過嚟啊！過嚟打死佢啊！
細路老竇（跪地）：畀番個仔我啊，唔該你呀，我得一個仔咋！唔該畀番個仔我，你畀番個仔我我即刻走啊！我求你……
（德仔老竇上前去搶，畀佢哋用槍打中。三人退至電梯口，二人先走，留一人劫住凌凌漆）
老鄉甲：睇住佢啊，其他環境我哋全部控制曬喇！
某人甲（用槍指住凌凌漆）：企喺度！
（鏡頭轉向李香琴屋企嘅牆，阿漆把飛到原來插住一隻烏蠅，鏡頭轉回現場，凌凌漆腰間插住刀）
老鄉甲（進入電梯，向同伴嗌）：走啦。
（凌凌漆猛然抽出刀，斜劈落去，寒光一閃，手槍已斷，再一閃，鮮血四濺。凌凌漆戴上眼鏡，附和著搖搖欲墜嘅歹徒）
同鄉甲：阿雄，快啲。阿雄——，快啲呀！（兩人攞起槍）阿雄——
（凌凌漆使出飛刀絕技，將兩人解決。戴上禮帽，隱身而去。匿喺一邊嘅阿琴睇到目瞪口呆，警察人員來收拾現場，被嚇呆咗。
一警員：哇！玩雜技呀？

阿琴屋企嘅洗手間裡面

阿琴（對住馬桶）：我初頭諗住自己唔使喐手，可以借刀殺人，點知——計劃失敗咗。
司令：你冇收到我嘅命令咩？幾時輪到你自把自為啊？
阿琴：我知，但系，我真繫好想知道凌凌漆，究竟系一個咩人。
司令：收聲！你以咩身份來問我啊？他系咩人關你咩事？記住，你阿媽系漢奸，你老竇系走狗，你阿爺系賣國賊，你就系漢奸、走狗、賣國賊，呢樣嘢系天生嘅，冇得改變嘅！當年冇我收留你，你早就陪埋佢哋去打把。你條命系我嘅，我叫你做乜你就照做！清唔清楚？……阿琴，我知道你個人有時心腸實在太軟，你知唔知凌凌漆繫個咩人嚟架？系衣冠禽獸，佢以前無惡不作，專強姦大肚婆，非禮細路女。（舉起一幅圖片）你睇嚇啲細路女幾咁細個，呢啲大肚婆個肚幾咁大，全部系畀佢糟蹋嘅。你呢次唔單止系為我，直程系為民除害！重有咩問題？
阿琴：冇嘞。
司令：好！噉聽日照原定計劃，喺賴有為屋企落手。
阿琴：知道
（凌凌漆喺外面，試圖打開廁所門，開門後凌凌漆企喺門邊身著一條底褲再披一件壽袍，口裡含住煙斗，手裡轉住兩個健身球）
凌凌漆：你冇嘢吖嘛，你？
阿琴：咩事？
凌凌漆：冇，我見你閂埋度門喺度咁耐，我敲極門又冇人應先斗膽撞門入嚟睇嚇啫。（走入沖涼房）咦，沖緊涼啊？
阿琴：系，我冇事，唔該閂番度門。
凌凌漆：嗯（從裡面將門關上）真系估唔到今日會發生件噉嘅事。
阿琴：我系叫你返出去，然後同我閂番度門。
凌凌漆：Oh, yes, well, I am sorry...
阿琴：出去呀————————————
(凌凌漆出門，阿琴到門邊，凌凌漆又入嚟)
阿琴：你想點啊？
凌凌漆：做唔做啊？
阿琴（好驚）：做咩啊？
凌凌漆：做帛金。
阿琴：做咩帛金呀？
凌凌漆：德仔老竇。
阿琴：邊個德仔老竇呀？
凌凌漆：今日喺商場無辜嗰個死難者。
阿琴：做帛金？
凌凌漆：攞去報館交畀阿德仔屋企得唔得呢？
阿琴：得啩。
凌凌漆：署名用無名氏好定有心人好呢？
阿琴：是但啦。
凌凌漆：大家萍水相逢，又唔系咁熟，做住五嚿水表嚇心意啦，好唔好？
阿琴：你話事吖。
凌凌漆：我嗰五嚿水你幫我出埋啦，好嘛？
阿琴：你唔系嘛？
凌凌漆：我完成咗呢個任務有五嚿水獎金，到時還畀你啦。
阿琴：嚇——？
凌凌漆：得架喇，帛金嘅嘢唔會走你嘅。
阿琴（猶豫，驚慌）：哦。

去賴有為屋企前

（車上）
阿琴：呢個賴有為，專走私國寶，恐龍頭骨嘅失蹤九成同佢有關（遞 照片畀凌凌漆），叉住腰呢個就系佢喇。陣間你見機行事，重有咩問題？
凌凌漆：有啊。其實李香蘭系咪真系令壽堂呢？因為據我所知，佢系一個漢奸。（見阿琴唔高興）對唔住，當我冇問過。
阿琴：時間差唔多喇，落車。
（兩人落車）
凌凌漆：阿琴，如果今天能夠完成任務嘅話，我就走架喇，所以睇嚇你鍾意啲咩，我送畀你。
阿琴：唔使喇。
凌凌漆：要嘅。
阿琴：白玫瑰吖。
凌凌漆：You are very romantic！
阿琴：或者我送畀你呢。
凌凌漆：very romantic！（將箱子平著放於地上，一隻腳踏上去）如果今晚重有時 間嘅話，不如我哋到香港嘅卡拉OK度觀摩一下。
阿琴：（遞個通話器畀凌凌漆）你喺入面，我會同你保持聯絡。
凌凌漆：唔講你唔知，我唱起歌上嚟把聲同阿學友把聲一摸一樣，嗱，你睇個喉核又會上下噉戳！
阿琴：（遞鎖匙畀凌凌漆）呢條後門鎖匙，快啲啦，冇時間喇！
凌凌漆（接過鎖匙）：我唱歌你聽吖，就唱你老母李香蘭 。
阿琴：我話畀你聽啊，我逼不得已先同你企埋一齊，你唔好再喺我面前提李香蘭，唔好再喺我面前唱歌，唔想聽到你喺度亂噏啊！（一拳打落凌凌漆臉上）
凌凌漆：你呢種愛恨分明嘅性格我真繫好欣賞。（阿琴嬲到背過身去，凌凌漆將鑰匙掉到身後）呢條鎖匙我唔需要（另一隻腳亦踩上箱度）喺我腳底下呢個篋並唔系普通嘅篋，而系「篋中之神」，簡稱「篋神」。佢可以將我安全又瀟灑噉輸送到賴有為屋企度。
（「嘀」一聲響，凌凌漆騰空而起）
凌凌漆：篋——神——。（喺空中翻觔斗，落地一睇仍系原處）嗯！你入嚟做咩啊？你想點呀？
阿琴：你問我想點？我問你想點啊！
凌凌漆：（一睇個箱）Oh，Shit！未校角度，所以直上直落噉解嘅啫。宜家得喇。（撳一下按鈕，向斜前方衝去）篋——，唉呀（撞 落牆度。）
阿琴：度門開咗架喇，入去啦。
凌凌漆：阿琴，即系我呢就唔系浪得虛名嘅。
阿琴：抹咗啲血先講啦。
凌凌漆：好啊，又得啫。睇嚟個篋系擺錯咗少少位，移番正佢冇事架喇。（擺正位置，企上去）
阿琴：喂！你唔好嘥我時間得唔得啊？
凌凌漆：得嘅咧，畀多次機會我。篋——神———
（凌凌漆成功咗，真系入咗賴有為屋企）

賴有為屋企

凌凌漆（打咗個響指）：Dry Martine，唔該！
（服務員攞過嚟，卻被一位女士攞走，兩個面面相覷）
凌凌漆：望咩啫，攞過杯嚟啦，望。離曬譜嘅你都，望——喎！唉。
阿琴（喺外面裝槍）：阿漆，入面咩環境啊？
凌凌漆（睇住自己左邊跳嚇跳嚇著泳衣嘅女仔）：好凶險，呢度啲賓客呢個個都凶神惡煞嘅，但系又好好相語喎，真系講你都唔信呀。
服務員（自助肉食前）：先生，你呢？
凌凌漆：呃——我自己嚟啦，唔該！
（凌凌漆抽出自已把豬肉刀剁肉，剁好一嚿攞走是發現目標賴有為，正喺度接電話）
賴有為：喂？（示意兩邊美女離開，自己進入室內）
凌凌漆（用對講機講）：發現目標。
凌凌漆跟到門邊，調好接收器）
賴有為：嗱，小心聽住嚇，骨頭呢，要……
（凌凌漆接收器裡出現噪音，聽唔清）
賴有為：聽住啊，我講多一次，啲豬骨呢要出出水佢，去咗啲肥膏先，然後花膠就將佢熬成個鐘頭。
電話裡面嘅人：噉你幾時番嚟飲湯啊？
賴有為：得喇，呢啲嘢你唔好煩我啦，我老婆重喺入面架。
（凌凌漆接聽到足球廣播直播，阿叔把聲：……羅馬裡奧交畀白必圖，必圖憑住個人技術連過兩關，一射入網啊！……）
阿琴：阿漆，點啊？聽到啲乜野？
凌凌漆：初步相信，有個叫白必圖嘅偷咗恐龍骨，跟住重用佢嘅個人的技術連過兩關然後一射入網，但系呢度嘅信號好微弱，（唔知喺邊度攞咗一把錘同螺絲批）家下我 諗住可唔可以喺呢度掘條隧道入到佢梳化椅底聽嚇佢講咩。
阿琴：（喺度瞄準緊）阿漆，唔好咁多廢話，快啲行去另外一個接收得好啲嘅地方。
凌凌漆：行來行去電波都重系干擾住，硬系聽唔清楚賴有為喺裡面講緊咩。
阿琴：阿七，你試嚇行去一笪冇咁多人嘅地方。
凌凌漆：我前面有個鋼琴位，冇乜人。
阿琴：你行過去試嚇。
凌凌漆：好啊。（大步走到鋼琴前，坐低，左右搖動）都重系收唔清楚。
阿琴：咪兩頭喐啦，坐定，得架喇，（瞄準）啱曬。
凌凌漆：一個人坐喺度，真系覺得有多少尷尬。
阿琴：你唔繫好鍾意唱歌嘅咩？咪唱首歌囉。
凌凌漆：都好喎。
凌凌漆（彈琴）：夜雨凍， ……照片中（對對講機）呢句唔記得歌詞
回頭似是夢，無法彈動，
留住凝望你，退色照片中，
啊……像花雖未紅，如冰霜不凍，
卻像有無數說話，可惜我聽不懂，
啊……是杯酒漸濃，或我心真空，
何以感震動——。
凌凌漆：點啊，得唔得啊？
阿琴（感動到呆曬）：麻麻地吖。
凌凌漆：系噉意畀啲意見啦。
阿琴：振音差噉啲。（阿琴放低槍，若有所思）
（一陣亂花碎影閃過，凌凌漆被長髮女提到胸前）
長髮女：你簡直系出類拔萃。
凌凌漆（向後一睇）：使得出呢招移形換影嘅功夫，睇嚟你都並非等閒之輩。
長髮女：唔怕坦白同你講，其實我喺度等緊個好重要嘅人，我諗呢個人你都識嘅。
（長髮女攞出一張照片畀凌凌漆睇，正系嗰日喺餐廳嗰個藝術家所拍嘅嗰張相）
凌凌漆：對唔住，無可奉告。
長髮女：我從來唔勉強人嘅，不過有樣嘢我好想話畀你聽，我真繫好欣賞你（上前親吻凌凌漆快面，同時凌凌漆睇到一個鐵人緩緩喺屋頂行走，並擰斷一支路燈柱）I love you!
（鐵人將柱子將凌凌漆擲去，凌凌漆及時避開，定睛一睇，長髮女掹槍欲射自己，跳到台後面。場內秩序好亂，長髮女開槍射擊。凌凌漆番起紅檯布，檯布落下人已消失，長髮女側身一 睇，凌凌漆掹出飛刀，擊中佢手腕，女子逃走。凌凌漆都逃走，點知槍聲響起，對住佢射）
凌凌漆：阿琴，收唔收到，呢度好危險！好多殺手唔知匿喺邊度？
（阿琴正喺度開槍，射中咗賴有為，凌凌漆匿入樹蔭裡面，點知又跑番出嚟）
阿琴：（心裡諗）咁大只蛤乸隨街跳？
（凌凌漆伸手向草木叢中，阿琴繼續瞄準射擊，擊中凌凌漆身體多處。阿琴奮力跑去車度， 將槍放到車後座，上車正要開鑰匙打火，車門被撞開，阿琴吃驚大叫）
凌凌漆（喘氣）：我中咗槍。
阿琴：中咗槍你重咁行得嘅？
凌凌漆：好在有避彈衣，不過最衰冇避彈褲。
（阿琴欲摸手槍行事，凌凌漆卻遞一支白玫瑰畀佢）
凌凌漆：畀你嘅。
阿琴：做咩啊？你喺邊度攞架？
凌凌漆：正話臨走見到摘嘅，我呢啲唔系度度有架，算你好彩。
（阿琴接過沾滿鮮血嘅鮮花，回想起剛才凌凌漆伸向花草叢中嘅畫面）
阿琴：你使唔使咁認證啊？黐線架？
凌凌漆：你點知架？好多人都系噉講喎。不過，金槍人嘅殺手重喺裡面，我哋快啲開車先講，快啲呀！
（發動之後，汽車卻被抬起）
阿琴：啊——咩嚟架？（原來系鐵人）
凌凌漆：冇有怕，有我喺度啊，定啲嚟吖。（控制方向盤）
阿琴：跛咗你好坐低啦，等我嚟。（阿琴向鐵人開槍，鐵人避槍放低部車，用拳向車窗打落去）
凌凌漆阿琴：撞佢老母！（撞低鐵人後逃去）
鐵人：哼！算你哋走得快。
（返到阿琴阿琴屋企，阿琴拖住凌凌漆，地上一長條血痕，琴關上門）
阿琴（嗍氣）：點啊？
凌凌漆（喘氣）：紗布、棉花、鉸剪，有冇啊？
阿琴：（睇住握手中嘅白玫瑰，沉思片刻）有！
（阿琴到廁所攞工具，司令嘅鈴聲響起，出現司令嘅樣，阿琴冇理會，冚上馬桶蓋）
阿琴：搵唔到鉸剪啊。
凌凌漆（掹到出嚟，寒光一閃）唔使喇。（凌凌漆欲舉刀，卻無力，刀插喺地板上）粒子彈射咗入我大髀骨，壓住我條大動脈，迸住 條三叉神經線，宜家我左邊腦開始缺氧麻痺，右半身開始癱瘓，（撕開條褲，露出傷口）一定要劏開個傷口攞番粒子彈出嚟先得。
（阿琴出力掹刀，但系掹唔出）
凌凌漆：等我嚟。（用力掹出刀，劃著一條火柴，燒刀刃）呢把刀系當年嘅鑄劍天王干將莫邪嘅御用菜刀，用天山寒鐵所鑄成，淨重七七四十九斤又十六兩零四安士，普通人 唔系咁易攞得起嘅。（用刀割傷口，好痛苦）呢下好考功夫，因為要避開所有神經線同埋血管，幫我擘開個傷口佢吖。
阿琴：嚇？
凌凌漆：頂唔住呀？
阿琴：頂得住。
凌凌漆：見唔見粒子彈啊？
阿琴：黑色嗰嚿？
凌凌漆：唔系，黑色嗰嚿孖筋嚟啫，冇鬼睬佢吖，上少少吖。
阿琴：白色嘅？
凌凌漆：系，白色嗰度就系骨，隔離銀色嗰粒就系子彈喇。
阿琴：我睇到嘞，攝得好入啊！
凌凌漆：（從桌上攞出錘、螺絲批）幫我鑿佢出嚟。
阿琴：鑿？！
凌凌漆：鑿。
阿琴（空中錘敲螺絲批）：就噉鑿？
凌凌漆：唔系點鑿啊？
阿琴：你唔使麻醉架？
凌凌漆：（一定神）要。（摸出一盒錄像帶）撳著餅帶佢吖。
（阿琴放盒錄像帶，畫面上卻系鹹片）
阿琴：你唔系入錯帶系咪？
凌凌漆：冇，呢招叫做轉移視線分心大法。
阿琴：這招分明叫老漢推車，你唔好當我唔識嘢喎。
凌凌漆：我系講緊我呢個方法，系古代神醫華佗所用嘅麻醉大法。古時有關雲長全神貫注捉象棋刮骨療毒，今日有我凌凌漆聚精會神睇鹹帶鑿骨攞彈頭，開始——（見阿琴 望住電視機發呆）遲啲先睇吖！
阿琴：哦。
（鹹帶裡面發出鬼妹叫床聲，阿琴一路幫凌凌漆鑿骨）
凌凌漆：噢——，嗯——
阿琴：啲骨頭同子彈太近喇，隔離重有好多神經線，好痛啊，你忍嚇。
凌凌漆：黑人都有啊？嗯——。（電視裡面鬼妹：嗯——啊——）做咩停曬手啊？（向下一睇）噢，我 專登將全身嘅血扯埋一齊集中喺一碌，以免佢失血過多嘅啫。唔好理埋啲無謂嘢，繼續啦。
阿琴：佢遮住我視線啊，你撥開佢吖。
凌凌漆（撥開衫）：Yeah！Come on！大力啲！（阿琴用力一擊）大力啲——
阿琴：做咩啊？太大力啊？
凌凌漆：我唔系你講啊，我同個黑人講架咋。
阿琴：Sorry，sorry。（阿琴挖時鮮血飛濺）咁多血嘅？
凌凌漆：哦冇，你鑿斷咗我條血管啫。
阿琴：噉點啊？你繼續睇鹹帶嚇！（凌凌漆面容憔悴，鮮血流到滿地都系）你頂得住吖嘛？？
凌凌漆：同我傾嚇偈，問嚇我嘢，總之唔好畀我瞓著，因為瞓著咗我驚唔會再醒。
阿琴：你叫咩名啊？
凌凌漆：我叫凌凌漆。可以問啲深啲嘅。
阿琴：深啲啊？有個農場，雞嘅數目就系鴨嘅四倍，噉呢鴨呢就比豬少九隻，噉鴨加埋豬嘅總和就系六十七，噉請問成個農場啲動物加埋有幾隻腳？
凌凌漆：都系等我問你啦。
阿琴（喊）：你問啦。
凌凌漆（一側目）：嗰幅畫裡面一男一女系邊個嚟架？
阿琴：我爸爸我媽媽。
凌凌漆：點解唔見樣嘅？
阿琴：細細個，死咗喇，冇咩印象。
凌凌漆：噢，I am sorry，原來大家都系孤兒，唔怪得咁好傾啦。阿琴，唔該曬你呀。
阿琴：唔好客氣，你頂住唔好死啊！
凌凌漆：可唔可以熄熄冷氣呀？有啲凍。
（阿琴象畫中人物一樣，同凌凌漆相攜而坐。阿琴攞出彈頭，將火藥倒到傷口上，點燃火柴。阿七
一聲慘叫，應聲暈倒）
阿琴：阿七，七啊！阿七！
凌凌漆（突然彈起）：掂曬（阿琴嚇得一跳），不過如果講消毒止血，呢招真系萬試萬靈。
（阿琴前去擁抱阿七，阿七睇到台上嘅子彈）
凌凌漆：點二二四痰罐仔子彈，聽講系你專用個喎，你支UFO長腳型來福槍一定重喺出面架車度咧？（阿琴變色，鬆開擁抱凌凌漆嘅雙手）其實系你開槍打我嘅，系唔系？（ 凌凌漆 挨住喺張椅上）要殺我做咩又救我啫？（阿琴望住地上嘅白玫瑰搖頭）金槍人同你究竟咩關係？
阿琴：你唔使問，我咩都唔會講。身為一個間諜，既然殺你唔到嘅，結果只系得一個，（掉支槍畀凌凌漆）嚟吖！
凌凌漆：好啊。（執起槍，舉槍將阿琴身後嘅碟打碎）咁近都射唔中，唉，槍法真咂苲。（拾掇行李）冇辦法，唉，（從錄像機攞埋餅鹹帶出嚟）打打殺殺唔好煩我，我睇鹹帶好過。（ 點煙，著衫走人，出門臨別一句）當我冇見過你啦。
（阿琴端坐，若有所思，突然跑向門口，開門，一見是「阿七」）
阿琴：阿七！（抱住阿七）你唔好走啊，你唔可以返去架！其實總司令就系金槍人，嗰嚿恐龍骨……（覺得唔對路）乜你高咗嘅？
假阿七：哼，你終於都講出真相喇咩！（一揭臉皮，原來是賴有為屋企嘅長髮女）你真人瘦過張相咁多嘅？做漢奸搵唔到食啊？唔系呀嘛？
（長髮女掹槍，阿琴想逃走，鐵人破窗而入，滿身玻璃，將身上嘅一塊放入口食）
鐵人：小姐，有冇藥水膠布啊？
長髮女：睇你個樣真繫好鬼死可愛，難怪我哋陳司令都死喺你手上啦。
鐵人：我想見一見你總司令，麻煩你帶一帶路，嘿嘿……

喺刑場上

（凌凌漆返到大陸，背景系一塊「四有新人」嘅宣傳牌。嚟到司令辦公室）
司令：你知唔知道，原來阿琴出賣咗國家！
凌凌漆（搖頭）：唔知。
司令：國家咁信任佢，佢竟然……系邊個打傷你嘅？
凌凌漆：我諗系金槍人做嘅。
司令：噉阿琴呢？阿琴去咗邊度？
凌凌漆：唔知，佢失咗蹤。
司令：嘿！（普通話）真是（唔知佢噏乜）？敵人也太狡猾了，居然可以無孔不入！哎，你的傷口現在怎麼樣了？哈？
凌凌漆：應該都（普通話）沒有問題……
司令：（普通話）什麼沒有問題，你還在流血嘛，來，（遞本簿畀凌凌漆）你趕快簽了它，跟著你就去醫院看醫生了，療傷要緊！小偉，馬上送他去醫院。其他那些暫時不用擔心。
警衛（開門後對凌凌漆）：呢便吖。
（凌凌漆被帶出屋外，路過刑場）
李力持：望咩啊？過嚟吖！等緊你啊！
凌凌漆：呢個時候打靶都有嘅？唉，運路行吖。
警衛：唔使喇，到喇。
（凌凌漆被強行戴上手銬）
警衛（掹出凌凌漆把刀）：都幾重手喎。
凌凌漆：喂！做咩事啊？做咩事啊？
警衛：冇嘢冇嘢！
凌凌漆：冇嘢你都講得出口嘅？喂宜家我有嘢喎（警衛用繩綁起阿七）喂！
警衛：咪喐啊。
凌凌漆：餵你有咩講清楚好喎。
警衛：得架喇。
刑長：凌凌漆，親自簽字承認走私販賣國寶，罪無可恕，無需審判，即是槍決！
（漆想逃走，被鳴槍警告）
警衛：返埋去！
凌凌漆：嗱咪住先啊嗱，我冤枉架……
黃一飛：嗱咪住先嗱我冤枉架，我根本就冇偷睇到國防機密，你哋做人要哋良知先得架。系人都知道我盲加嘛，你哋居然屈一個盲人，話佢偷睇國防機密咁離譜……（槍聲響起，中彈倒下）
凌凌漆：各位手足，我同阿陳局長都好熟架，間唔中呀飲嚇茶添啊……
犯人甲乙：咪住啊！咪住啊……我老竇就系陳局長，你殺我，我叫佢殺番你架。
刑長：預備！（其他人舉槍瞄準）
犯人甲乙：唔好啊……
犯人甲：我咁靚仔——我唔想死啊——
犯人甲乙（痛哭）：哇——啊——（中數槍後倒下）
刑長：你個撲街吖！喊得你咁樣衰！咁樣衰！（上前又補數槍）
李力持：死得好啊！
刑長（打槍後再用槍大力打屍體）：下一個。
（凌凌漆下意識將腳尖鏟入泥土，準備逃走，一睇李力持都系噉做）
李力持：三十年嘅若練，今日終於大派用場。
刑長：預備。
李力持（大笑）：想殺我鐵腿水上飄？！冇咁易！（鏟土潑向槍手，躍起又落地，地上形成兩道溝，又順住牆頭飛去，越飛越遠，一聲追魂炮，李力持爆炸了，手攞炮筒嘅士兵完成任務後向刑長行咗個禮。凌凌漆目瞪口呆）
刑長：預備。
（凌凌漆嚇到跪低）
刑長：行刑！

最後決鬥

（倉庫內，集裝箱內系恐龍骨，士兵關上箱門）
司令：三十分鐘內將貨物送到邊境貨運站，買家喺嗰便接應。
衛兵：是。開車。
（正要開車，車玻璃被打爛，伸出一手捻住司機條頸。原來系鐵人，兩個司機都被打倒）
陳寶蓮：你嘅買家已經死咗嘞，恐龍頭骨亦都唔使麻煩你，我們會自己運返瀋陽。（顯出拘捕令）精精地束手就擒，否則格殺勿論！
鐵人：金槍人，（帶出李香琴）我哋連你嘅得力手下都已經捉埋嘞，你快啲投降罷啦。
（司令快速掹槍射擊李香琴數槍，李香琴慘叫倒地）
阿琴：小叭喇——（起身）你重系人嚟嘅？好彩我著咗避彈衣啫！枉我同你出生入死，問都唔問講都唔講你就噬我？好，你噬我吖嘛？（對長髮女同鐵人講）噬佢！
（倉庫內激戰，司令邊戰邊退，阿琴開火爆炸，很多士兵被炸）
阿琴：佢做初一，我做十五。好！我同你哋合作，我知佢喺邊，跟我嚟吖！
（司令穿過幾道機關，入到自己辦公室，攞出鐵甲衣，鐵人撞穿牆而過）
司令：嚟啦，我等緊你哋。（射擊）
阿琴：小心啊！（三人被轟倒）
司令（上子彈，瞄準阿琴）：著避彈衣都射死你！
（三人又被轟倒，阿琴腿部俾嘢壓傷，鐵人舉起鋼箱掟向司令，司令閃過，鐵人上前攻擊司令，被射傷手臂，長髮女見到鐵頭受傷，好心痛望住）
鐵人：唔好望喇，快啲出絕招啦！
長髮女（走上前去，鐵奶罩伸出兩條長管）：高熱火焰！（噴出電焊火）睇你個盔甲頂唔頂得住我三萬度嘅高熱火焰！喝——（重未叫完，火就熄咗）
鐵人：哎呀弊喇，Sorry啊，尋晚煮公仔面做宵夜，用咗你啲石油氣冇通知你，唔好意思，唔好意思。
長髮女：（大驚失色）嚇——？
司令 （開槍，長髮女粉身碎骨，剩番兩個鐵奶罩從空中跌落嚟）玩火吖嗱？波都打爆你呀！金牙佬，輪到你喇！
鐵人：咪當我流至得架！鐵——甲——飛——拳（鐵拳頭飛出）
（司令被擊中向後飛，巨大嘅力量使司令撞倒三埲牆。同時佢開咗一槍，鐵人被粉碎，剩低一棚金牙）
司令（將鐵人嘅飛拳從心口掹出，行到阿琴前）枉我供你讀書，畀飯你食，估唔到你會為咗一個豬肉佬背叛我！（阿琴向司令搏命開槍，但系對司令嘅鐵甲毫無影響）凌凌漆頭先已經啱啱打靶死咗喇，你咁鍾意佢，我就送你落去培佢啦！
（司令舉槍指住阿琴，此時背後有凌凌漆嘅身影出現）
阿琴：阿漆！
（睇真啲，原來系達聞西，阿琴好失望）
達聞西：哼！我一早睇穿你嗰籠嘢架喇。
（此時有一隻手從聞西頭上攞走頂帽自己帶上，原來系凌凌漆）
凌凌漆：一早睇穿你又唔早講！
司令：凌凌漆？
阿琴：阿漆，你冇事呀？
凌凌漆：得喇，我冇事。啲對白唔好咁例牌吖，唔該。
司令：你唔系拉咗去打靶嘅咩？
凌凌漆：講起火都嚟添啊，你累我唔見咗一嚿水。（回憶用一百文收買行刑官兵嘅鏡頭……）所謂上樑不正下樑歪，估唔到你嘅手下重貪過你，虧你重有面企喺「忠黨愛國」四個字之前，總之中國一日有你呢個大魔頭，啲老百姓都唔會有好日子過。我今日一定要做瓜你。
司令：就憑你兩個廢柴？
達聞西：廢柴？（除咗面衫）我費一生精力，集合十種殺人武器於一身嘅——超級武器霸王，產品編號攞你命3000，經已研究成功咗喇！阿漆，企埋啲！（阿漆退後）遠啲！（阿漆繼續退後）再遠啲！（阿漆跑開好遠）
司令：系咩？我真系想見識嚇。
達聞西：攞你命3000——！（攞咗一搊爛嘢出嚟）西瓜刀、單車鏈、火藥、硫酸、毒藥、手槍、手榴彈、三角銼……每樣都系獨當一面嘅，家下集合埋一齊，問你死未？
司令：嗯，你呢個黐線佬都系早死早著。（舉槍指向聞西）
達聞西：唉！咪住！
（此時司令已經開槍，子彈穿過聞西只手，聞西受傷痛苦靠牆坐低）
凌凌漆：聞西！
達聞西：阿漆，靠你喇。（暈倒）
凌凌漆（除面衫）：既然系噉，冇辦法喇，我唯有單刀附會啦。（從腰間掹刀出嚟）
司令（除面罩）：豬肉刀？哈哈……（凌凌漆跟住笑）豬肉刀呀……哈哈……
（凌凌漆行向司令，司令一路笑一路上子彈，突然開槍）
阿琴：唔好啊！
（凌凌漆用刀擋住子彈，向後滑行好大一段距離，一睇，子彈嵌入刀中，阿漆冇事，司令非常驚訝，阿琴非常開心。阿漆繼續行向司令，司令再舉起槍，阿漆突然將飛向司令，司令馬上開槍。一陣煙氣過後，司令見凌凌漆正向自己走過嚟）
司令：（普通話）你他XX的臭小子，看一看你有多大本事！（一路講一路上子彈，凌凌漆正在運氣）讓你瞧瞧我的厲害！
（凌凌漆運氣，將刀從地下吸起到手上，跳起盡力向司令一劈，然後擺咗個pose）
司令（除面罩）：（普通話）你這把什麼刀？
凌凌漆：豬肉刀囉，專斬畜生嘅。
（司令嘅金槍斷開兩段，向阿漆背面走去，突然跪低，鐵甲裂開，倒下。阿漆擺咗個好有型嘅姿勢將刀插入腰間刀套中）

尾聲

（深圳某一市場豬肉攤前，只見豬肉攤左遙右擺，冇人做生意）
買菜北姑：喂，豬肉佬啊，畀五文豬肉嚟吖。
凌凌漆（從下面伸個頭出嚟，一路嗍氣一路講）：喂，唔做生意住喇，個零鐘頭之後再嚟過啦。
買菜北姑：你得唔得啊？睇你咪最多三分鐘，豬肉佬。
凌凌漆：三個鍾未必得啦。
阿琴（都從下面伸個頭出嚟）：漆啊，不如返屋企先搞吖。
凌凌漆：費事兩頭行啦，況且呢度環境好啲。（對北姑）去！去！（繼續搞）
（突然電子通訊器響起，達聞西喺顯示器上出現）
達聞西：阿漆，呢次大鑊喇！我哋個間諜衛星喺外太空失咗蹤啊。呢次關係到國家安危，十億人民嘅生「屎」（死），而且我又扎咗職，你都唔想我孭鑊架，幫幫手快啲返嚟啦。
凌凌漆：家下搞緊兒女私情，國家大事啲濕碎嘢借歪先啦，聞西。
達聞西：哎呀，我講過好多次啦，系達——聞——西呀……
（未講完阿漆就將顯示器關咗，將遙控器向後掟，繼續搞嘢。此時，搖動嘅砧板上插住凌凌漆嘅豬肉刀，刀上寫住：民族英雄——小平贈）

（劇終）